Kryeministrja e Britanisë së Madhe Theresa May, është duke bërë përpjekjet e saj të fundit për të bindur deputetët që të mbështesin marrëveshjen për Brexit, ndërkohë që hedhja në votim për këtë çështje do të bëhet të mekurën.
May pritet të mbajë fjalim sot, për të paralajmëruar se Parlamenti më lehtë mund të bllokojë Brexit-in, sesa të largohet nga Bashkimi Evropian pa një marrëveshje.
Gjatë një takimi që pritet të zhvillojë me punëtorët e një fabrike, May do të thotë të hënën: "Siç e kemi parë gjatë javëve të fundit, ka disa të cilët do të dëshironin të vononin ose madje të ndalonin Brexit-in dhe të cilët do të përdorin çdo mjet që kanë në dispozicion për ta bërë këtë ", raporton BBC.
Ajo do të shtojë se beson se deputetët kanë më shume gjasa që ta bllokojnë Brexit-in sesa të realizohet një skenar pa marrëveshje.
Ajo ka thënë se do të ishte katastrofike në rast se rezultati i referendumit për daljen e Britanisë së madhe nga BE, nuk zbatohet.
Ndërsa laburistët kanë paralajmëruar votë mosbesimi ndaj kryeministres May në rast të humbjes.
Lideri Jeremy Corvyn i tha BBC-së, se laburistët do të votojnë kundër marrëveshjes dhe se do të nisin përgatitjet për zgjedhje të përgjithshme në rast të dështimit të votimit të marrëveshjes.
