Diplomatë të shumtë në Rusi vendosën ditën e shtunë buqeta me lule në një urë pranë selisë së Kremlinit, ku në vitin 2015 u vra politikani i opozitës Boris Nemtsov.
Nemtsov, që shërbeu përkohësisht si zëvendës kryeministër nga fundi i viteve ’90 përpara se të bashkohej me opozitën, po punonte për një raport që ekzaminonte rolin e Rusisë në konfliktin në Ukrainë.
Pas vrasjes së tij, më 27 shkurt të 6 viteve më parë, aktivistët e opozitës nisën ngritjen e një memoriali, por autoritetet vendore i penguan dhe refuzuan kërkesën për vendosjen e një pllake përkujtimore në nder të tij.
Përkujtimi i së shtunës vjen në një kohë kur opozitari tjetër rus, Alexei Navalny ndodhet i burgosur. Aleatët e tij u bënë thirrje mbështetësve që të vendosnin lule në urën e Moskës, ku eksponenti i opozitës ra pre e atentatit.
Mes personave që vendosën buqeta me lule ishin edhe ambasadori amerikan John Sullivan dhe ambasadorja britanike Deborah Bronnert.
Në vitin 2017, një gjykatë ruse dënoi 5 persona me nga 11 deri në 20 vjet burg për përfshirje në vrasjen e Nemtsov, por aleatët e tij deklarojnë se personat që urdhëruan ekzekutimin janë ende të lirë.
