Derbi i xhiros së 14-të të Superligës ndërmjet Llapit dhe Prishtinës është duke u zhvilluar në stadiumin “Zahir Pajaziti”. Kjo ndeshje me protokollin e Federatës së Futbollit të Kosovës do të duhej të zhvillohet pa praninë e tifozëve në stadium.
Megjithatë, kjo për skuadrën vendëse dhe zyrtarët e ndeshjes nuk po vlen, pasi kanë lejuar tifozë të futen në stadium.
Prapa portës së portierit të Llapit, Hoffman, shihet një numër i tifozëve të cilët janë futur pa ndonjë problem, ndonëse disa metra larg tyre janë edhe zyrtarët policorë.
Delegat në këtë ndeshje është Senad Hamziq, por duket se Hamziqit nuk po i pengojnë këta tifozë, ani pse punon sipas rregullave të Federatës së Futbollit të Kosovës.
Në protokollin e FFK-së për këtë periudhë të pandemisë, lejohen vetëm nga 10 zyrtarë të klubeve dhe gazetarët që përcjellin ndeshjen.
Këtë nuk po e respektojnë asnjë klub i Superligës, jo vetëm Llapi sot.
FFK ende nuk ka lejuar rikthimin e tifozëve që nga fillimi i pandemisë.
Prishtina është duke e fituar ndeshjen me rezultat 0:1 me golin e Endrit Krasniqit.
