Theo Hernandez dhe Kolo Muani shënuan dy golat në portën e Marokut dhe dërguan Francën në finalen e Kupës së Botës, aty ku “gjelat” do të kërkojnë të ruajnë kurorën dhe të shtojnë trofeun e tretë në palmares.
Mbrojtësi i Milanit dërgoi topin në rrjetë me një kombinim perfekt në minutën e 5-të, duke shënuar kështu golin e dytë më të shpejtë në një gjysmëfinale Botërori, pasi të parin e ka shënuar braziliani Vava më 1958-ën, pikërisht kundër Francës.
Edhe sulmuesi i Eintrachtit, Kolo Muani do ta mbajë mend gjatë këtë mbrëmje, pasi shënoi me prekjen e parë të topit, në minutën e 79’. Muani kishte vetëm 44 sekonda në fushë, duke u bërë i treti futbollist që shënon më shpejt pas hyrjes në fushë, pas Morales në 2002-shin dhe Ebe Sand në 1998-ën.
