Legjionarët/ 5 gola e 3 asiste, paraqitje e shkëlqyer e kuqezinjve

Futboll

Legjionarët/ 5 gola e 3 asiste, paraqitje e shkëlqyer e kuqezinjve

Më: 29 prill 2024 Në ora: 11:45
Foto ilustrim

Futbollistët e Kombëtares shqiptare që luajnë në kampionatet jashtë vendit, kanë mbyllur një tjetër javë me paraqitje pozitive me klubet e tyre përkatëse, duke dhënë kontributin me gola e asiste.

Taulant Seferi shkëlqeu në Emiratet e Bashkuara Arabe me klubin e tij Bani Yas në fitoren 4-2 ndaj Hatta. Sulmuesi kuqezi shënoi dy golat e parë të takimit, fillimisht në fundin e pjesës së parë (45+1) dhe në fraksionin e dytë në minutën e 51-të. Por Seferi nuk u ndal me kaq, pasi dhuroi edhe dy asiste për shokët e skuadrës në pjesën e dytë. Një paraqitje fantastike për Seferin që u përzgjodh edhe lojtari i ndeshjes, i vlerësuar me notën 9.8 nga sajti i specializuar për statistika sofascore.

Myrto Uzuni dha kontributin e tij me një gol në fitoren 3-0 të Granada-s ndaj Osasuna. Sulmuesi i Kombëtares shqiptare realizoi goli e dytë të takimit, teksa ky ishte goli i 11-të sezonal për Uzunin në La Liga.

Mirlind Daku zhvilloi një tjetër paraqitje pozitive me skuadrën e tij Rubin Kazan. Sulmuesi kuqezi në ndeshjen e fundit ndaj Zenit ishte protagonist absolut në fitoren 2-0, teksa gjeti rrugën e rrjetës dhe asistoi për shokun e skuadrës. Daku fillimisht zhbllokoi takimin në minutën e 50-të, ndërsa në të 67-ën shërbeu saktë për Martynovich që realizoi edhe golin e dytë.

Në Turqi, rrugën e rrjetës e gjeti sërish Rey Manaj. Në takimin Sivasspor – Konyaspor ku ishin titullar të dy sulmuesit e Kombëtares shqiptare, Sokol Cikalleshi dhe Rey Manaj, ndeshja u vendos nga Manaj i cili shënoi golin e vetëm dhe të fitores për skuadrën e tij. Ky ishte goli i 18-të sezonal për sulmuesin kuqezi në kampionatin turk.

Titullarë me skuadrat e tyre u aktivizuan edhe Elhan Kastrati, Berat Gjimshiti, Enea Mihaj, Frederic Veseli, Jon Mersinaj, Mario Mitaj, Naser Aliji, Ernest Muçi dhe Arbnor Muçolli ndërkohë dhanë kontributin e tyre si zëvendësues Elseid Hysaj, Kristjan Asllani, Qazim Laçi, Keidi Bare, Nedim Bajrami, Armando Broja, Arbër Hoxha dhe Arbnor Muja.

comment Për komente lëvizni më poshtë
Sot mund të lexoni Shfletoni kopertinat