Alaves ka marrë kreun e kampionatit spanjoll, edhe pse ndoshta deri sot në mbrëmje, falë fitores 1-0 regjistruara të premten në Vigo.
Tomas Pina shënoi golin vendimtar për baskët, që e kanë nisur në mënyrë fantastike sezonin e ri.
Një ndeshje perfekte në organizim për Alaves, që i la zotërimin e topit Celta-s, u mbrojt me shumë kujdes dhe goditi në rastet e pakta që krijoi, me vetëm dy goditje në kuadrat në gjithë ndeshjen.
Meritë e padiskutueshme e trajnerit Abelardo, i cili brenda një viti e ka transformuar totalisht Alavesin, klub që nuk ka fituar asnjë trofe në historinë e vet, edhe pse mund të krenohet me një finale në Kupën UEFA, ku u mundën nga Liverpool në vitin 2001.
Sezoni i shkuar nisi mjaft keq për Alavesin, që ndërroi trajner dhe punësoi ish-trajnerin e Shqipërisë, Gianni De Biasi.
Edhe me italianin gjithçka shkoi keq dhe në nëntor, pas 6 humbjesh në 8 ndeshje, erdhi ndryshimi i radhës, me Abelardo që mori vendin e De Biasit.
Që atëherë, nga vendi i fundit, Alaves pati një rritje konstante duke e mbyllur sezonin në një pozicion shumë komod, ndërsa tani kap majat.
Titull e Champions nuk i ëndërron askush, natyrisht, por gjithnjë del një ekip që habit të gjithë dhe qëndron deri në fund në garë për një vend në kupat e Europës. Ndoshta këtë vit e ka radhën Alaves.