Sociologu Besim Gollopeni ka thënë se ende në shoqërinë kosovare femra trajtohet si “pronë” e burrit dhe për fatin e saj ajo nuk mund të vendos vetë.
Gollopeni, në “Debat Plus” me Ermal Pandurin, ka thënë se pavarësisht se ende qëndrojmë më mirë se vendet perëndimore, divorcet në shoqërinë kosovare janë duke shënuar rritje.
“Sigurisht se ka shumë arsye pse ndodhin divorcet dhe këto ndryshojnë në kohë dhe hapësirë. Por është e saktë se kemi një rritje të numrit të divorceve në Kosovës”.
Ai thotë se në Kosovë lufta ka mundur të ketë ndikuar në ngritjen e divorceve por edhe emigracioni dhe ndryshimet e shpejta sociale e ndikimin e tyre.
“Ne pavarësisht se mund të dukemi si shoqëri e hapur, në thelb ende mbetemi shoqëri patriarkale…Në të kaluarën, femra në Kosovë ka qenë e varur nga burri dhe ajo ka heshtur nga dhuna. Ajo nuk ka mundur të kërkojë divorc sepse është konsideruar se po i bëhet barrë familjes së babës”, tha ai.
Profesori i historisë thotë se rritje të divorceve në shoqërinë kosovare ka pasur edhe pas luftës së dytë botërore por vitet e fundit trendi është më i keq.
“Në vitet ’80 në çdo të 44-ën martesë ka ndodhur një divorc, ndërsa sot në Kosovë në çdo 11-ën martesë kemi një divorc, pra në krahasim me të kaluarën kemi rritje të divorceve për katërfish”.
Gollopeni thotë se çdo divorc që ka ndodhur në shoqërinë tonë është paragjykuar duke stigmatizuar gjithmonë femrën në këtë rast.
“Madje janë quajtur gra të pa zonja për të mbajtur një burrë. Shikoni deri në çfarë stadi kanë shkuar këto nivele të shoqërisë sonë kosovare në këto fenomene”.
Ai thotë se bota mashkullore ende po e ka të vështirë të pranojë femrën si të barabartë dhe të dal nga mentaliteti patriarkal.
“Kjo trashëgimi nuk mund të ndryshohet për pesë vite apo një dekadë…Në disa provinca ende femra konsiderohet si rob i burrit apo familjes dhe për fatin e saj nuk vendos vet ajo por burri apo anëtarët tjerë të familjes”, tha ndër të tjera Besim Gollopeni.
