Policia në Podujevë është duke vazhduar me shqiptimin e gjobave për personat që s’i përfillin masat anti-covid.
Vetëm në muajin dhjetor në këtë qytet policia ka gjobitur mbi 400 qytetarë
Kështu ka thënë komandanti i stacionit policor në këtë komunë, Isak Ejupi.
Eupi në mbledhjen e shtabit emergjent komunal ka thënë se gjatë tërë kohës janë të angazhuar në zbatimin e planit operativ për implementimin e masave për parandalimin e pandemisë Covid-19.
“Gjatë muajit dhjetor janë shqiptuar 424 gjoba për qytetarët të cilët nuk kanë respektuar masat anti-covid”, është shprehur ai.
Gjithashtu, komandanti Ejupi informoi anëtarët e shtabit se vazhdimisht janë në monitorimin e personave të prekur me virus, për respektimin e vetizolimit.
Aktualisht në këtë komunë janë rreth 200 raste aktive. Që nga fillimi i pandemisë, e deri më tani, numri i të infektuarve në Llap ka arritur në rreth 2 mijë e 200. Deri më tani, janë raportuar 40 viktima, mbi 1900 pacientë janë shpallur të shëruar.
Si pasojë e rënies së lakores më të infektuar të rinj, Komuna e Podujevës ditë më parë është larguar nga zona e kuqe, për të kaluar kështu në zonën e verdhë. Tash në këtë komunë nuk ka orë policore, e cila fillonte nga ora 20:00 dhe vazhdonte gjer në 05:00 të mëngjesit.
Komunat me rrezik të mesëm të infeksionit, e ku bënë pjesë edhe Podujeva, janë ato që kanë prej 76 deri në 149 persona të infektuar në 100.000 banorë. Komunat të cilat bëjnë pjesë në zonën e verdhë, operatorët ekonomikë lejohen të punojnë nga ora 06:00 deri në orën 18:00.
Shërbimet e hotelerisë dhe gastronomisë lejohen të punojnë nga ora 06:00 deri në ora 18:00, pas orës 18:00 punojnë me shërbim “merr me vete” dhe “porosi-dërgesë”.
Qendrat tregtare lejohen të punojnë prej orës 06:00 deri në ora 18:00. Transporti publik në këto komuna lejohet të punojë me 50 për qind të kapaciteteve duke respektuar manualin për mbrojtjen nga përhapja e sëmundjes COVID-19.
Ndërkohë, Shtabi Emergjent, në mbledhjen e mbajtur dje ka paralajmëruar gjithë qytetarët dhe bizneset se policia dhe inspeksioni do të ndërmarrin masa të rrepta ndaj atyre nuk respektojnë masat anti-Covid.
Njëkohësisht është apeluar te qytetarët që të vazhdojnë të bartin maskat dhe të mbajnë distancën sociale.
