Një çerep dhe një bukë
zëri i fyellit në një sukë
borë e bardhë si plis mbi male
këngë e vashave në livadhe
uji i lumit rrjedhë nën urë
rreze dielli mbi ca gurë
çerdhe zogjësh shqiponje në plep
gaz i foshnjës zgjuar në djep
çifteli e pushkë në kullë
gjyshi pi duhan në llullë
në një ëndërr në agim
gjeografi e shpirtit tim...
Dashuri në mungesë
unë do të të dua edhe në mungesë
siç të kam dashur nëpër mote
në ëndrrën time pa adresë
mjaltë e helm në fund të një gote
në ëndrrën time pa adresë
mjaltë e helm në fund të një gote
do të të dua dhe në mungesë
siç të kam dashur nëpër mote
do të të dua dhe në mungesë
siç të kam dashur nëpër mote
mjaltë e helm në fund të një gote
në ëndrrën time pa adresë...
Asgjë nuk është më si dikur
ferrat mbuluar i kanë arat dhe livadhet
kostarëve ndryshkur u janë kosat
barinjtë nuk dalin më në maje boke
ujku hëngër i ka delet
bareshat nuki ia thonë këngës në kupë të qiellit
as gjerdan me lule nuk bëjnë në fillim as fund të prillit
asgjë më nuk është asgjë si dikur
as xha Lami nuk nxjerr më anës lumit gur...