Përfaqësuesit e institucioneve në Prishtinë janë akorduar që punimet e rrugës Deçan –Plavë të ndalohen edhe të bisedohet me të faktorët që janë përfshirë në këtë projekt, ndërsa këtë hap të qeverisë abati Sava Janjiq e ka vlerësuar dhe cilësuar si trimërues e inkurajues, shkruan “Telegraf”, transmeton “Bota Sot”.
Abati i manastirit në Deçan arkimandriti Sava Janjiq theksoi me këtë rast se ndalimi i punimeve në magjistralen Deçan-Plavë në zonën e manastirit nga qeveria dhe pushteti lokal në Deçan është trimërues edhe inkurajues.
“Ky është gjest shumë inkurajues nga qeveria edhe komuna, që tregon se ndërtimi i kësaj rruge mund të bëhet me ndërtimin e unazës përreth zonës së manastirit, në harmoni me vendimin e mëhershëm të qeverisë me 2014 “ ka thënë Janjiq.
Nga Eparkia e Rashkës - Prizrenit më herët ishte tërhequr vërejtja se për shkak të vazhdimit të punimeve dhe mekanizmit të rëndë që përdoret dhe kamionëve mund të ketë dëmtime statike të vetë objektit i cili daton nga shekulli 14 dhe objekteve të kishës dhe objekteve përcjellëse.
Kryeministri i qeverisë së Kosovës Avdullah Hoti dhe kryetari i komunës së Deçanit Bashkim Ramosaj dje janë pajtuar në bisedën që patën se punimet në rrugën Deçan –Plavë të ndalohen, u kumtuar nga kabineti i kryeministrit të Kosovës.
Në kumtesë që transmeton “Telegraf” thuhet se ata janë pajtuar që të gjendet zgjidhje përmes bisedimeve me të gjithë faktorët që janë të kyçur në këtë problem.