Prokuroria Themelore Publike (PTHP) do ta vazhdojë hetimin kundër personave të përfshirë në procedurën hetuese të 27 prillit të 2017-s në Kuvendin e Maqedonisë së Veriut, por tash për tash nuk do të kërkojë masa tjera për sigurim të pranisë së të dyshuarve.
“Prokuroria Themelore Publike për Ndjekjen e Krimit të Organizuar dhe Korrupsionit do ta vazhdojë procedurën hetuese kundër personave për të cilët u interesuat. Tash për tash, Prokuroria nuk do të kërkojë masa tjera për sigurim të pranisë së personave”, thanë për Portalb.mk, nga PTHP-ja.
Nevoja për kërkim të masave tjera për sigurim të pranisë së deputetëve Trajko Veljanoski dhe Ljupço Dimovski, vjen pasi që paraprakisht në Kuvendin e Maqedonisë nuk iu hoq të njëjtëve imuniteti dhe me këtë nuk u realizua paraburgimi i kërkuar paraprakisht nga PTHP-ja. Heqja e imunitetit nuk u hodh fare në votim, për arsye që i deklaroi kryetari i Kuvendit, Talat Xhaferi sepse në rastin e Dimovskit nuk kishte shumicë, e kurse në rastin e Veljanoskit nuk u rekomandua marrja e imunitetit nga Komisioni për Çështje të Rregullores, Mandatit dhe Imunitetit.
Heqja e imunitetit për deputetin Trajko Veljanoski vjen pasi që e njëjta u kërkua nga Gjykata, për parashtrim të masës së parbaurgimit, të kërkuar nga PTHP-ja sepse dyshohet se, bashkë me Nikolla Gruevskin, Nikolla Boshkovskin, Mile Janakieskin dhe Spiro Ristovskin kanë organizuar sulmin në Kuvendin e Maqedonisë së Veriut më 27 prill të 2017-s.
Ndërkaq, marrja e imunitetit të deputeti Ljupço Dimovskit vjen pasi që i njëjti dyshohet se ka keqpërdorur pozitën zyrtare deri sa ka qenë ministër në Ministrinë e Bujqësisë, dhe bashkë me Mihail Cvetkovin, Aco Spasenoskin dhe Kristijan Dellevin kanë dëmtuar buxhetin shtetëror për 1.4 milionë euro. Të njëjtëve u është ngrirë edhe pasuria.
Në opinion ka lindur dyshimi, se dështimi i heqjes së imuniteti të Veljanoskit dhe Dimovskit, mund të hapë rrugën për arratisjen e tyre. Kjo ka përplasur Kuvendin dhe Porkurorinë për marrjen e përgjegjësië në rast se ndodh e njëjta.
