“Jemi dëshmitarë se sa hapa të rëndësishëm ka bërë qeveria juaj, për realizimin e qëllimit të anëtarësimit në BE. I ndjekim gjitha zhvillimet, sidomos në fushën e sundimit të së drejtës. Zgjerimi është hap i rëndësishëm për BE-në dhe shpresoj se këtë vjeshtë do të merret vendimi që Maqedonia e Veriut dhe Shqipëria t’i fillojnë negociatat për anëtarësim në BE”.
Këtë mesazh e dha ministri i Punëve të Jashtme i Finlandës Pekka Haavisto, i cili po qëndron për vizitë zyrtare në vend.
Ai tha se hapja e negociatave me BE-në është edhe qëndrim i Finlandës, si kryesuese me BE-në, por shtoi se në procesin e sjelljes së vendimeve respektohen qëndrimet e gjitha shteteve tjera anëtare në BE.
“E dimë se Bundestagu në Gjermani ka marrë vendim pozitiv dhe duhet të presim që edhe shtetet tjera të përfundojnë këtë procedurë”, tha Pekka Haavisto.
Ai nuk tregoi nëse është optimist ose pesimist për fillimin e negociatave, por potencoi se debati për anëtarësimin e Maqedonisë së Veriut dhe Shqipërisë është intensifikuar në Bruksel dhe se ka shumë komente pozitive.
