Aleksandar Vasilevski “Ninxha” i akuzuar për ngjarjet e 27 prillit tha se ai dhe DSK-ja i kanë montuar kamera analistit Albert Musliu në shtëpinë e tij me qëllim që ta ndjekin lëvizjen e tij derisa ka ndodhur publikimi i “bombave”.
“Zoran Zaevi, Zoran Verushevski dhe Oliver Spasovski ishin të ndjekur nga Drejtoria e pestë. Ka dokumentim për këtë, Drejtoria e pestë filloi t’i ndjek kur filluan të publikohet bombat. Ndoqëm edhe gazetar. I vendosëm kamera shtëpisë së Albert Musliu”, iu përgjigj Vasilevski gjyqtares Villma Ruskovska.
Ndërsa pas kësaj informate, analisti Albert Musliu për gazetën Koha ka thënë: “jam i shqetësuar edhe pse mund të paramendoj se në çfarë skajshmërie ka mundur të shkojë regjimi i kaluar. Megjithatë ky është një shqetësim, si për mua, ashtu edhe për familjen time dhe bashkëpunëtorët e mi. Prandaj do të përdorë të gjitha mundësitë institucionale dhe gjyqësore që përgjegjësit të ndëshkohen dhe të gjejë satisfaksionin tim personal”.
Albert Musliu është komentues dhe analist i proceseve në Maqedoni i cili është shpesh herë në emisionet e debateve të televizioneve.
