Kjo ka qenë pamja e lagjeve periferike të qytetit të Shkodrës këtë të enjte.
Pothuajse të gjithë kazanët e mbeturinave kanë qenë të tejmbushur pasi prej mbrëmjes të së mërkurës nuk janë pastruar pasi kamionët e pastrimit vazhdojnë të qëndrojnë të bllokuar para landfillit të Bushatit.
Shkak është bërë ngërçi i krijuar mes bashkisë Shkodër dhe asaj të vaut të dejës, pas vendimit të marrë prej kësaj të fundit për rritjen e tarifës për depozitimin e mbetjeve urbane në landfillin e Bushatit.
“Jemi para një katastrofë mjedisore, institucionet duhet të ndërhyjnë. Kam vënë në dijeni edhe ministrin Klosi për këtë çështje. Mjetet janë bllokuar sonte dhe situata është e rëndë, e gjithë bashkia Shkodër pa shërbim pastrimi. Prefektja të mbledh palët dhe të gjejë zgjidhjen e shpejtë. “
Vendimi i marrë nga Këshilli Bashkiak i Vaut të Dejës parashikon rritje me 43% të tarifës së depozitimit të mbetjeve për banorët e qarkut Shkodër dhe Lezhë.
Ndërkohë në bashkinë Lezhë deri më tani nuk ka pasur probleme pasi kompania që merret me pastrimin e qytetit ka pranuar të paguajë tarifën.
