Gjykata e Tiranës ka dënuar për shpifje, me një gjobë prej 300 mijë lekësh të reja ish-deputeten e Partisë Demokratike, Jorida Tabaku.
Vendimi i togave të zeza erdhi pas padisë që Kryeministri Rama bëri ndaj Tabakut, e cila në muajin Gusht të 2018-ës akuzoi vëllain e kryeministrit për lidhje me kompanitë e lojërave të fatit dhe se ato do të mbylleshin për t’i pasur nën menaxhim Olsi Rama.
I menjëhershëm ka qenë edhe reagimi i ish-deputetes demokrate. Përmes një postimi në rrjetet sociale, Tabaku e cilëson politik vendimin e dhënë nga gjykatësja, e cila sipas saj është nën presionin e vetingut dhe në konflikt interesi me Partinë Demokratike.
Ajo paralajmëron se nuk do të ndalet por do ta vijojë betejën e saj ligjore në Gjykatën e Apelit.
