Activision Blizzard Inc ka rënë dakord të paguajë 32.3 milionë euro (35 milionë dollarë) për të shlyer akuzat e Komisionit të Letrave me Vlerë dhe Shkëmbime të SHBA-së (SEC) se nuk kishte sisteme për të trajtuar siç duhet ankesat e punëtorëve dhe për shkeljen e rregullave të mbrojtjes së sinjalizuesve, tha rregullatori të premten.
SEC tha se kompania e dinte që çështjet e mbajtjes së punonjësve ishin “një rrezik veçanërisht i rëndësishëm në biznesin e saj”, por nuk kishte masa adekuate për të menaxhuar ankesat për sjellje të pahijshme në vendin e punës nëpër njësitë e biznesit midis 2018 dhe 2021.
“Activision Blizzard dështoi në zbatimin e kontrolleve të nevojshme për të mbledhur dhe shqyrtuar ankesat e punonjësve për sjellje të pahijshme në vendin e punës, gjë që e la atë pa mjetet për të përcaktuar nëse ekzistonin çështje më të mëdha q.ë duhej t’u zbuloheshin investitorëve”, tha Jason Burt, i cili drejton zyrën e SEC në Denver në një deklaratë për shtyp, raporton Reuters.
Zhvilluesi dhe kompania botuese e lojërave video, e cila prodhon lojën e njohur “Call of Duty”, gjithashtu kërkoi nga punonjësit midis 2016 dhe 2021 që t’i tregonin kompanisë nëse SEC i kontaktonte ata për informacion – një shkelje e rregullave të mbrojtjes së sinjalizuesve, tha agjencia në deklaratë.
Përfaqësuesit për Activision Blizzard, të cilët nuk i pranuan apo mohuan akuzat e SEC, thanë në një deklaratë se ishin “të kënaqur që e kishin zgjidhur këtë çështje në mënyrë miqësore” dhe kishin “përmirësuar” raportimin e tyre në vendin e punës dhe përmbajtjen e kontratës.
Kompania bëri ndryshime midis majit 2020 dhe majit 2022, me të cilat ndryshime përmirësoi mënyrën e mbledhjes së ankesave dhe komunikimin me menaxherët e lartë, tha SEC në urdhrin e saj.
