Google ka paralajmëruar se projektligji i ri australian për sigurinë në internet mund ta detyrojë kompaninë të kufizojë aksesin e personave nën 18 vjeç në shërbimin Gmail. Nisma vjen në vazhdën e masave të Australisë për të mbrojtur të miturit nga përmbajtjet e dëmshme në internet.
Sipas Reuters, Rachel Lord, përgjegjëse për politikat e YouTube në Australi dhe Zelandën e Re, ngriti shqetësimin gjatë një seance dëgjimore në Senatin australian më 9 nëntor. Ajo argumentoi se kërkesat për verifikimin e moshës, veçanërisht në rastet kur të miturit mund të ekspozohen ndaj materialeve pornografike, mund të prekin edhe shërbime si email-et, mesazhet private dhe ruajtja e skedarëve.
Google nuk është e vetmja kompani që kundërshton projektligjin. Meta, TikTok dhe Snap paralajmëruan se kompetencat e gjera që do t’u jepen autoriteteve mund t’i shtyjnë platformat të fshijnë më shumë përmbajtje sesa nevojitet, për të shmangur gjobat që mund të arrijnë deri në 109.2 milionë dollarë australianë.
Projektligji, i cili ka kaluar Dhomën e Përfaqësuesve, kërkon që ofruesit e shërbimeve të marrin masa për mbrojtjen e përdoruesve, veçanërisht të miturve. Ai parashikon gjithashtu kontroll mbi rekomandimet algoritmike, heqjen e aplikacioneve që krijojnë imazhe intime pa pëlqim dhe përgjigje brenda 24 orëve ndaj ankesave për bullizëm kibernetik.
Kjo nismë vjen pas ndalimit të rrjeteve sociale për personat nën 16 vjeç, që hyri në fuqi më 10 dhjetor 2025, duke e bërë Australinë vendin e parë që zbatoi një kufizim të tillë.