Microsoft ka sfiduar vendimin e Britanisë për të bllokuar blerjen me vlerë prej 69 miliardë dollarëve të prodhuesit të “Call of Duty” Activision Blizzard për shkak të “gabimeve themelore” në vlerësimin e shërbimeve të lojërave cloud të Microsoft.
Rregullatori anti-trust i Britanisë, Autoriteti i Konkurrencës dhe Tregjeve (CMA), vuri veton ndaj marrëveshjes në prill, duke thënë se kjo mund të dëmtojë konkurrencën në tregun e sapolindur të lojërave cloud, duke shkaktuar zemërim.
Microsoft konfirmoi të mërkurën se kishte paraqitur një apel kundër vendimit në Gjykatën Britanike të Apelit të Konkurrencës (CAT) dhe një përmbledhje e argumenteve të tij u publikua të premten, raporton Reuters.
Tutje gjiganti amerikan i teknologjisë tha se konkludimi i CMA se marrëveshja do të çonte në një pakësim të konsiderueshëm të konkurrencës në tregun e lojërave cloud të Mbretërisë së Bashkuar ishte i gabuar, sipas përmbledhjes.
“CMA bëri gabime thelbësore në llogaritjen dhe vlerësimin e të dhënave të pjesës së tregut për shërbimet e lojërave cloud duke mos marrë parasysh kufizimet nga lojërat vendase”, raportohet të ketë thënë Microsoft në Tribunalin e Apelit të Konkurrencës.
Rima Alaily, zëvendës presidente dhe zëvendës këshilltare e përgjithshme e Korporatës së Microsoft, tha se vendimi i CMA ishte “me të meta për arsye të shumta, duke përfshirë mbivlerësimin e rolit të transmetimit në cloud në tregun e lojrave dhe pozicionin tonë në të, si dhe mosgatishmërinë e tij për të shqyrtuar zgjidhje që mori mbështetje dërrmuese të industrisë dhe publikut”.
“Ne jemi të sigurt në forcën e apelit tonë dhe në angazhimet detyruese që kemi bërë për të rritur konkurrencën dhe zgjedhjen për lojtarët sot dhe në të ardhmen”, shtoi ajo.
