4 limonata verore

Ushqime

4 limonata verore

Më: 13 gusht 2021 Në ora: 15:44
Foto ilustrim

Përbërësit: 1.5 litra ujë • 3 limonë të mëdhenj organikë • 70 g sheqer (rregulloheni vetë sipas shijes personale) • 2 lugë gjelle qumësht

Përgatitja:

1.Në zjarr, vëmë një tenxhere me 1 litër ujë bashkë me sheqerin. E përziejmë herë pas here që sheqeri të tretet. E heqim dhe e lëmë mënjanë që të ftohet.

2.Në tenxheren ku kishim ngrohur ujin me sheqerin, hedhim 0.5 litra ujë që na kanë mbetur dhe kur të marrë valë, e heqim nga zjarri. Shtojmë lëkurat dhe lëngun e limonëve të shtrydhur në çast dhe e lëmë të pushojë për 15 minuta. Pas kësaj kohe, përziejmë të dyja lëngjet duke hequr më parë lëkurat e limonit dhe shtojmë qumështin. E shërbejmë pasi ta kemi lënë në frigorifer të ftohet për 3-4 orë.

Ujë i aromatizuar me manaferra

Përbërësit: 1 litër ujë

• disa feta limoni • disa gjethe rozmarine – mos e përdorni nëse nuk ju pëlqen • 50 g manaferra ose boronica

Përgatitja:

Një pjesë të manaferrave të lara, i ndajmë në mes me thikë dhe i hedhim në një kanë me ujë, të cilën e lëmë një natë në frigorifer. Të nesërmen, e shërbejmë me manaferrat që kishim lënë mënjanë, disa gjethe rozmarine dhe feta limoni.

Limonadë me lule livande dhe rozmarinë

Përbërësit për 4/6 persona:

500 ml ujë • 160 ml lëng limoni • 120 g sheqer • 4 lugë të vogla lule livande të thata • 2 degë të vogla rozmarinë të freskët – kini kujdes pasi rozmarina e freskët ka aromë të fortë

Përgatitja:

1. Në një tenxhere të vogël, vëmë të marrë valë gjysmën e ujit me sheqerin, derisa të shohim që sheqeri është tretur. Fikim zjarrin, shtojmë livandën, rozmarinën dhe e lëmë të pushojë për 30 minuta në temperaturë ambienti.

2. Pas kësaj kohe, e kullojmë me sitë dhe shtojmë gjysmën tjetër të ujit, të ftohtë nga frigoriferi dhe lëngun e limonit të shtrydhur në çast.

E lëmë në frigorifer për të paktën 2 orë dhe më pas e shijojmë.

Çaj i ftohtë me pjeshka

 Përbërësit: 1 litër ujë mineral

• 3 lugë me lule të thata (kamomil, livandë ose atë që keni, por me shije delikate) ose 2 lugë kamomil të thatë dhe 2 lugë livandë të thatë

• 4 pjeshka të pjekura, por të forta

Për shurupin: 50 g sheqer + 70 ml ujë mineral

Përgatitja:

Në një tas qelqi, vëmë ujë të ftohtë dhe lulet e thata. E mbulojmë me plastmasë kuzhine ose kapak dhe e lëmë në frigorifer për 30/40 minuta. Pastaj e kullojmë dhe e vëmë përsëri në frigorifer.

Ndërkohë, përgatitim shurupin: ziejmë ujin me sheqerin në një tenxhere të vogël derisa sheqeri të tretet. E heqim nga zjarri dhe kur të jetë ftohur, e hedhim në tasin ku kemi lëngun tjetër. Shtojmë pjeshkat të prera në feta dhe i lëmë për 3 orë në frigorifer që të aromatizojnë çajin. E shërbejmë me kuba akulli.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat