​Kongo: Persona të armatosur të paidentifikuar sulmuan qytetin Bukavu

Afrika

​Kongo: Persona të armatosur të paidentifikuar sulmuan qytetin Bukavu

Më: 3 nëntor 2021 Në ora: 13:34
Foto ilustrim

Luftimet shpërthyen në qytetin Bukavu, në lindje të Republikës Demokratike të Kongos, pas inkursionit të personave të armatosur të paidentifikuar, njoftuan sot autoritetet dhe grupi i të drejtave të njeriut.

“Njerëz të dhunshëm dhe të paqytetëruar kanë prishur qetësinë e bashkëqytetarëve tanë në disa pjesë të qytetit Bukavu”, tha guvernatori i provincës së Kivusë Jugore, Theo Kasi, transmeton Reuters.

Ai tha se situata ishte nën kontroll, megjithëse një dëshmitar okular i tha Reuters se të shtënat në qytet mund të dëgjoheshin ende.

Autoritetet nuk kanë raportuar ende për viktima, sipas Reuters.

“Aktualisht, situata është mjaft konfuze, ne e dimë vetëm se njerëz të armatosur sulmuan disa pozicione të forcave të sigurisë, duke përfshirë armaturën e vendosur në lagjet industriale të qytetit Bukavu”, tha një burim i Kombeve të Bashkuara.

Presidenti i grupit lokal për të drejtat e njeriut Jackson Kalimba, tha se sulmuesit mund të jenë anëtarë të milicisë që e quan veten "A64" dhe që është një grup i panjohur deri më tani.

"Ata erdhën në përpjekje për të liruar njerëzit e tyre që u arrestuan së fundmi këtu në Bukavu," tha Kalimba në një deklaratë.

Më shumë se 120 grupe rebele vazhdojnë të veprojnë në zona të mëdha të Kongos lindore edhe pas përfundimit zyrtar të luftërave civile të vitit 2003.

Qyteti i Bukavu u prek për herë të fundit nga luftimet në nëntor 2017, kur ushtria u përlesh me trupat besnike të një gjenerali renegat, sipas Reuters.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat