Forcat somaleze i japin fund sulmit të al-Shabab që shkaktoi të paktën 21 viktima

Afrika

Forcat somaleze i japin fund sulmit të al-Shabab që shkaktoi të paktën 21 viktima

Më: 21 gusht 2022 Në ora: 17:12
Rekrutët e grupit terrorist al-shabab të lidhur me Al-Kaedën ecin nëpër një rrugë në lagjen Deniile të Mogadishut. Fotografi ilustruese.

Forcat e sigurisë në Somali i dhanë fund të dielën një sulmi vdekjeprurës në një hotel në kryeqytetin Mogadishuë, ku u vranë të paktën 21 persona dhe shumë të tjerë u plagosën.

Forcave somaleze iu deshën më shumë se 30 orë për të neutralizuar luftëtarët që kishin sulmuar ditën e premte hotelin Hayat në Mogadishu në një sulm me armë që filloi me shpërthime të forta.

Sipas autoriteteve policore luftimet përfunduan rreth mesnatës së të shtunës.

"Gjatë sulmit, forcat e sigurisë shpëtuan shumë civilë të bllokuar në hotel, përfshi gra dhe fëmijë," deklaroi zëdhënësi i policisë Abdi Hassan.

Policia ende nuk ka dhënë një shpjegim të detajuar se si ndodhi sulmi. Mbetet e paqartë se sa persona të armatosur hynë në hotel, ndërsa mediat lokale raportuan se sulmi u parapri nga të paktën dy shpërthime në hyrje të hotelit.

Autoritetet shëndetësore bënë të ditur se disa dhjetëra persona po trajtoheshin për lëndime në spitalet lokale, me disa ndodheshin në gjendje kritike. Ismail Abdi, menaxheri i hotelit, tha për agjencinë e lajmeve AP se forcat e sigurisë po punonin ende për të pastruar zonën.

Disa persona u mblodhën jashtë portave të hotelit të dëmtuar rëndë të dielën në mëngjes, duke vëzhguar skenën.

Grupi ekstremist islamik al-Shabab, i cili ka lidhje me al-Kaedën, mori përgjegjësinë për sulmin, në përpjekjet më të fundit për të goditur vendet e vizituara nga zyrtarët qeveritarë.

Sulmi në hotel është incidenti i parë i madh terrorist në Mogadishu që kur lideri i ri i Somalisë, Hassan Sheikh Mohamud, mori pushtetin në maj.

Sekretari i Përgjithshëm i OKB-së Antonio Guterres e dënoi sulmin, sipas deklaratës së një zëdhënësi që tha se OKB-ja mbështet popullin e Somalisë "në luftën e tyre kundër terrorizmit dhe marshimin e tyre drejt paqes".REL

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat