​Japonia është e shqetësuar për fluturimin e përbashkët të avionëve kinezë dhe rusë

Azia

​Japonia është e shqetësuar për fluturimin e përbashkët të avionëve kinezë dhe rusë

Më: 1 dhjetor 2022 Në ora: 12:41
Hirokazu Matsuno

Zëdhënësi i qeverisë japoneze Hirokazu Matsuno tha sot se Japonia ka shprehur shqetësim përmes kanaleve diplomatike tek autoritetet ruse dhe kineze për fluturimin e përbashkët të avionëve ushtarakë nga të dy vendet pranë Japonisë të mërkurën.

"Frekuenca dhe përhapja e aktiviteteve të tilla pranë vendit tonë ngre shqetësimet tona të sigurisë," tha Matsuno.

Autoritetet japoneze njoftuan dje se dy bombardues kinezë dhe dy rusë kishin fluturuar mbi Detin e Japonisë.

"Ne do të monitorojmë me kujdes zhvillimin e bashkëpunimit midis Rusisë dhe Kinës, me një ndjenjë shqetësimi," tha Matsuno, duke shtuar se Japonia "do të mbrojë me vendosmëri territoret e saj".

Ministria ruse e Mbrojtjes tha se bombarduesit rusë Tu-95MS dhe avionët ushtarakë kinezë H-6 fluturuan mbi Detin e Japonisë dhe Detin e Kinës Jugore për rreth tetë orë dhe se fluturimi u krye "në përputhje me ligjin ndërkombëtar" dhe " pa depërtim në hapësirën ajrore”.

Ministri i Jashtëm rus Sergei Lavrov theksoi sot se "Deti i Kinës Jugore po bëhet një rajon ku NATO dëshiron të rrisë tensionet".

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat