Presidenti i Brazilit Jair Bolsonaro deklaroi në llogarinë e tij në Facebook se nuk pranon të ndjekë direktivat për distancimin shoqëror nga Organizata Botërore e Shëndetit, sepse promovon ‘masturbimin’ tek fëmijët nën katër vjeç.
Në një postim në Facebook, i cili është hequr më pas nga profili i tij, Bolsonaro citoi një udhëzues të paqartë në lidhje me edukimin seksual për të vënë në dyshim autoritetin e OBSH-së për koronavirusin, shkruan Daily Mail.
Bolsonaro, 65 vjeç, u ankua në internet në lidhje me rekomandimet e supozuara të OBSH-ve, duke thënë që po promovojnë që “fëmijët nën moshën 4-vjeç të prekin trupin e tyre”.
Ai përdori këtë dhe referenca të tjera duke thënë se organizata globale nuk është në gjendje ta drejtojë situatën e pandemisë koronavirus.
Bolsonaro ka kritikuar vazhdimisht distancimin social dhe masat e izolimit, të caktuara nga OBSH si një mjet efektiv për të kufizuar transmetimin e sëmundjes Covid-19.
I pari i Brazilit në fakt po citonte një udhëzues të vitit 2010 nga Qendra Federale e Edukimit Shëndetësor në krahun evropian të OBSH-së.