Është arrestuar një çift, pasi që në veturën e tyre janë gjetur mbi 2 kilogramë marihuanë.
Policia e Kosovës ka bërë të ditur se janë arrestuar dy persona për veprën “blerje, posedim, shpërndarje dhe shitje e paautorizuar e narkotikëve”.
Sipas policisë deri te arrestimi i tyre ka ardhur pasi që të dielën në ora 23:30 në Komoran është ndaluar vetura e tipit “Golf 4”, me targa vendore dhe gjatë kontrollit në bagazhin e veturës janë gjetur dhe sekuestruar 2.125 kilogramë substancë e dyshuar narkotike e llojit marihuanë.
“Është njoftuar prokurori i shtetit dhe GJPP me urdhër verbal të së cilit është kontrolluar banesa (me qira) e të dyshuarit në rrugën C në Prishtinë, ku gjatë kontrollit janë gjetur dhe sekuestruar një peshore digjitale dhe një foli e cila shërbente për mbështjelljen dhe mbajtjen e narkotikëve, gjithashtu është sekuestruar edhe vetura Golf 4 me targa vendore dhe dy telefona”, thuhet në njoftim.
Pas intervistimit të dyshuarit, një femër dhe mashkull me vendim të prokurorit dërgohen në mbajtje për 48 orë.
