Ministri i Shëndetësisë Venko Filipçe, sot në konferencë për shtyp tha se nuk përjashtohet mundësia që virusi Covid-19, të jetë i pranishëm që nga viti i ri, para se zyrtarisht të zbulohet rasti i parë.
Ai këtë e tha pas dy rasteve të vdekjeve të cilat u zbuluan në një shtëpi në Veles, të cilët kishin ndërruar jetë që nga janari, ndërsa në testimet për coronavirus këto ditë, rezultuan pozitiv.
“Nuk përjashtohet mundësia që virusi të jetë i pranishëm në vendin tonë edhe më herët, sidomos duke pasur parasysh numrin e vdekjeve nga gripi sezonal këtë vit, si dhe publikimet se ka bartës pa simptomatik të virusit Covid-19”, tha Filipçe.
Ndryshe, dy personat që u gjetën të vdekur para katër ditëve në një apartament në Veles, sipas autopsisë kanë ndërruar jetë më 6 janar, ndërsa njëri prej tyre ka rezultuar pozitiv në testin për coronavirus.