Franca nuk ka propozim të ri për zgjidhjen e kontestit Maqedoni-Bullgari

Maqedonia

Franca nuk ka propozim të ri për zgjidhjen e kontestit Maqedoni-Bullgari

Më: 29 qershor 2022 Në ora: 16:08
Foto ilustrim

Vetëm një ditë para përfundimit të presidencës franceze me BE-në, Qeveria në Shkup pretendon se ende nuk kanë marrë propozim zyrtar nga Brukseli për tejkalimin e kontestit me Sofjen, dhe heqjen e bllokadës për fillimin e negociatave për anëtarësim.

Sipas kryeministrit Dimitar Kovaçevski, deri më tani në publik janë diskutuar vetëm draft idetë e Unionit, duke shtuar se bisedimet po vazhdojnë.

“Nuk janë të pranueshme idetë që nuk bëjnë mbrojtje të qartë të gjuhës maqedonase, të identitetit maqedonas dhe të cilat në negociatat shumëpalëshe me Bashkimin Evropian, do të jenë ekskluzivisht për çështje që kanë të bëjnë me sistemin e meritave, përkatësisht të mos përfshijnë çështjet bilaterale në një kornizë shumëpalëshe”, tha Dimitar Kovaçevski – Kryeministër.

Sipas opozitës, Kovaçevski konfirmoi se një ekip ekspertësh ende po zhvillon bisedime sekrete me Sofjen.

“Cilat janë qëndrimet e ekipit të dërguar nga Qeveria e Dimitar Kovaçevskit? Çka janë marrë vesh deri më tani, që disa njerëz të afërt me Qeverinë dhe LSDM-në, të thonë publikisht se ka hapësirë për të negociuar protokollin, edhe pse ne e dimë – çfarë do të thotë ai?”, deklaroi Dimçe Arsovski, zëdhënës i OBRM-PDUKM-së.

Ndryshe, sipas agjencisë AIM, diplomatët francezë në Bruksel nuk janë njohur me një iniciativë të re për zgjidhjen e mosmarrëveshjes dhe tani procesi është tërësisht në duart e Shkupit dhe Sofjes. Sipas qëndrimeve zyrtare, deri më tani nuk ka progres në bisedimet mes dy palëve dhe gjasat për fillimin e negociatave këto ditë janë më të vogla. Presidencën me Këshillin e BE-së do ta marrë të premten Çekia, e cila nuk e ka në prioritet procesin e zgjerimit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat