Kryetari i Aleancës për Ardhmërinë e Kosovës Ramush Haradinaj, ka shpallur kandidaturën për president të Kosovës.
Pas këtij vendimi të tij, ka reaguar edhe Aleanca Kosova e Re. Nënkryetari i kësaj partie Fatmir Matoshi, ka thënë se Behgjet Pacolli, është Presidenti që i duhet Kosovës.
Ai ka theksuar se Pacolli i ka miqtë dhe njohjet e mira në botë, duke shtuar se është treguar unifikues i skenës politike gjatë karrierës së tij politike.
Por, vet kreu i AKR-së nuk është deklaruar ende nëse do të kandidojë kësaj radhe për president të Kosovës.
Këtë e ka konfirmuar edhe Naim Murseli, këshilltar i Pacollit, në një intervistë për gazetën “Bota sot”.
Por, edhe sipas Murselit, Pacolli është personi i duhur për këtë post shtetëror. Si arsye për këtë, ai ka përmendur edhe aktakuzat e Gjykatës Speciale.
“Ai ende nuk është deklaruar që do të kandidojë kësaj radhe. Behgjet Pacolli ka qenë President për një kohë të shkurtër dhe ka dëshmuar se ai ishte personi i duhur për atë post të lartë shtetëror. Është po ashtu emër i pranuar nga ndërkombëtarët, duke pasur parasysh aktakuzat e Gjykatës Speciale”, ka deklaruar Murseli./BS
