Kompania Asus ka prezantuar kartelat grafike Dual GeForce RTX 2080 EVO, të cilat janë në dispozicion në dy variante bazuar në overclockimin e fabrikës. Të pozicionuara në mes serisë RTX 2080 Dual dhe RTX 2080 ROG Strix, kartelat grafike karakterizohen me një zgjidhje të madhe të ftohjes me tre sllote, të cilat i implementojnë ventilatorët Axial Tech, raporton TechPowerUp.
Ventilatorët e përmendur e kanë një barrierë unazore e cila e parandalon qarkullimin anësor të ajrit. Gjithashtu, kartela grafike e ka një fan-stop, i cili i fikë ventilatorët kur temperatura e GPU-së është nën 55°C.
Kartelat grafike furnizohen përmes kombinimit të konektorëve 6-pinësh dhe 8-pinësh PCIe. Daljet për displej i përfshijnë tre konektorë DisplayPort 1.4, një HDMI 2.0b dhe një konektor USB-C VirtualLink.
Siç u theksua, kartelat grafike vijnë në dy variante. Varianti bazik "DUAL-RTX2080-8G-EVO" e ka taktin referent të Nvidias prej 1710MHz GPU Boost, ndërsa varianti premium "DUAL-RTX2080-A8G-EVO" vjen me 1725MHz GPU Boost. Frekuenca e memories është 14Gbps (GDDR6-efektive). Asusi nuk i ka treguar çmimet e kartelave grafike.
