Zyra e Prokurorit të Përgjithshëm të Nju Jorkut: Trump të dhëna fiktive mbi vlerën e pasurive të tij

Amerika

Zyra e Prokurorit të Përgjithshëm të Nju Jorkut: Trump të dhëna fiktive mbi vlerën e pasurive të tij

Më: 19 janar 2022 Në ora: 16:20
Ish-Presidenti Donald Trump dhe avokatët e tij thonë se hetimi ka motive politike.

Zyra e Prokurorit të Përgjithshëm të Nju Jorkut njoftoi gjykatën të martën vonë në mbrëmje se hetuesit kishin gjetur prova se kompania e ish-Presidentit Donald Trump kishte përdorur të dhëna fiktive mbi vlerën e pasurive të tij, me qëllimin për të marrë kredi e siguruar përfitime tatimore.

Sipas dokumenteve të paraqitura në gjykatë zyra e prokurorit nuk ka vendosur ende nëse do të ngrejë një padi civile në lidhje me akuzat, por hetuesit po kërkojnë të marrin në pyetje zotin Trump dhe dy fëmijët e tij më të mëdhenj.

Ish-Presidenti Donald Trump dhe avokatët e tij thonë se hetimi ka motive politike.

Zyra e Prokurores së Përgjithshme Letitia James tha se organizata Trump ka ofruar të dhëna false mbi sipërfaqen e një apartamenti luksoz në pronësi të tij, që ndodhet në lagjen Manhatan të Nju Jorkut, duke e raportuar atë si rreth trefish më të madhe sesa sipërfaqja reale, një ndryshim në vlerë prej rreth 200 milionë dollarësh. Zonja James citonte mbi këtë çështje dëshminë e dhënë nga kryefinanciari për një kohë të gjatë i organizatës Trump, Allen Weisselberg, i cili u akuzua vitin e kaluar për mashtrim me taksat në një hetim penal paralel.

Zyra e zonjës James detajoi gjetjet e saj në një kërkesë paraqitur gjykatës, nëpërmjet së cilës kërkon të sigurojë marrjen në pyetje të zotit Trump, vajzës së tij Ivanka Trump si dhe djalin e tij Donald Trump Jr./VOA

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat