I dërguari i SHBA për klimën, John Kerry, bëri thirrje të mërkurën për një treg "të hapur dhe konkurrues" të energjisë në Meksikë, ku reformat e planifikuara të energjisë kanë alarmuar investitorët e huaj dhe ambientalistët, raporton France24.
Uashingtoni ka rritur presionin mbi Meksikën lidhur me shtytjen e presidentit Andres Manuel Lopez Obrador për të rritur rolin e shtetit në industrinë e energjisë -- lëvizje që kritikët thonë se favorizojnë lëndët djegëse fosile në vend të energjisë së rinovueshme.
Duke u takuar me Lopez Obrador dhe zyrtarë të tjerë të lartë në kryeqytetin meksikan, Kerry tha se vendi mund të "luaj një rol jetik dhe të jashtëzakonshëm" në përpjekjet për të trajtuar krizën klimatike.
“Meksika është e bekuar me pasuri që shumë vende të tjera nuk i kanë – erë e madhe, diell i mrekullueshëm, gjeotermale, hidro dhe lëndë djegëse fosile”, u tha ai gazetarëve.
"Ajo që ne duam të bëjmë është të punojmë me Meksikën në një mënyrë që do të forcojë... aftësinë e tregut për të qenë në gjendje të jetë i hapur dhe konkurrues," tha Kerry.
Reformat e mbështetura nga Lopez Obrador synojnë të forcojnë ofruesin shtetëror të energjisë elektrike dhe të zmbrapsin efektet e liberalizimit që presidenti i majtë thotë se favorizonte kompanitë private.
