Juria e Madhe në Manhattan ka paditur ish-presidentin amerikan Donald Trump pas një hetimi për një pagesë sekrete për yllin pornografik Stormy Daniels, duke e bërë atë ish-presidentin e parë të SHBA që përballet me akuza penale.
Detajet e akuzave me të cilat Trump do të përballet ende nuk janë bërë të ditura. Juria e Madhe madhe ka paditur Trump për pagesën e 130,000 dollarëve për aktoren pornografike Stormy Daniels, e cila pretendon se kishte një lidhje me të ndërsa ai ishte i martuar me gruan e tij tani, Melania.
Trump lëshoi një deklaratë menjëherë pas lajmit për aktakuzë ndaj tij.
“Ky është persekutim politik dhe ndërhyrje në zgjedhje që nuk ka ndodhur kurrë më parë. Që nga koha kur zbrita nga shkallët lëvizëse në Trump Tower dhe madje edhe para se të betohesha si presidenti juaj, demokratët radikalë të majtë – armiqtë e burrave dhe grave punëtorë të këtij vendi – nisën një gjueti shtrigash për të shkatërruar lëvizjen për një Amerikë të Madhe Përsëri”, ka shkruar Trump.
Kush është Stormy Daniels?
Lidhja me Stormy Daniels ka vazhduar prej vitesh, që nga koha kur ai ishte ende president. Stormy Daniels është 44 vjeçe. Ky nuk është emri i saj i vërtetë, emri i saj i vërtetë në fakt është Stephanie Clifford, por preferon emrin me të cilin u bë e njohur në industrinë e filmave për të rritur.
Ajo lindi në Baton Rouge, Luiziana dhe u rrit nga nëna e saj pasi prindërit e saj u divorcuan. Ajo u neglizhua si fëmijë dhe ishte nëntë vjeç kur u abuzua seksualisht nga një burrë i moshuar, shkruante ajo në një kujtim të botuar në 2018.
Pavarësisht gjithçkaje, ajo ishte një studente e mirë dhe i adhuronte kuajt, shkruante ajo. Për të fituar jetesën, ajo iu drejtua fillimisht striptizit dhe më pas industrisë së pornografisë, ku u bë një yll aktrimi, regjisore dhe skenariste dhe fitoi disa çmime. Ajo u bë e njohur për publikun e gjerë amerikan pas lidhjes së saj me Trump.
Ata u takuan për herë të parë në verën e vitit 2006 në një turne bamirësie golfi pranë liqenit Tahoe, në malet Sierra, në kufirin e Kalifornisë dhe Nevadës. Në atë kohë, ajo u shfaq në një rol të vogël në filmin e Judd Apatow, Virgjëresha Dyzetvjeçare, ndërsa Trump sapo ishte bërë baba i një djali me gruan e tij të tretë, Melania.
Daniels u pagua 130,000 dollarë për të heshtur para zgjedhjeve të 2016-ës
Ajo ishte atëherë 27 vjeç dhe Trump ishte 60. Sipas saj, ai e ftoi për darkë në banesën e tij. Më pas ata u angazhuan në atë që ajo e përshkroi si “seksi më i mërzitshëm i jetës së saj”. Trump mohon se ka qenë ndonjëherë intim me Daniels dhe e akuzon atë për “zhvatje” dhe “mashtrim total”.
Ajo që dihet me siguri është se Daniels mori 130 mijë dollarë për heshtjen e saj në prag të zgjedhjeve presidenciale të 2016-ës. Pagesa është pjesë e një hetimi të Gjykatës së Qarkut Manhattan për shkelje të mundshme të ligjeve të financimit të fushatës.
“Unë nuk jam viktimë”
Kur ai transaksion financiar doli në dritë në vitin 2018, Daniels i kërkoi gjykatës të anulonte marrëveshjen e moszbulimit me Trump dhe filloi të shfaqej në shfaqje televizive.
Në emisionin Sixty Minutes të CBS, Daniels dha versionin e saj të ngjarjeve. “Unë nuk jam viktimë”, tha ajo qartë dhe me vendosmëri, duke shtuar se ndërsa Trump nuk ishte tërheqës për të, marrëdhënia e tyre ishte vullnetare.
Trump i premtoi asaj se do të shfaqej në serialin e njohur The Apprentice, i cili e bëri atë të famshëm.
