Trump para Kongresit: Zelensky është gati për të nënshkruar marrëveshjen e mineraleve “në çdo kohë”

Amerika

Trump para Kongresit: Zelensky është gati për të nënshkruar marrëveshjen e mineraleve “në çdo kohë”

Më: 4 mars 2025 Në ora: 21:46 Përditësuar në ora: 06:58 më 05.03.2025
Donald Trump

Trump: Zelensky është gati për marrëveshje

Presidenti i Shteteve të Bashkuara, Donald Trump, tha se presidenti i Ukrainës, Volodymyr Zelensky, e ka informuar se është gati për bisedime me Rusinë për t’i dhënë fund luftës në vendin e tij dhe është ofruar për të nënshkruar marrëveshjen për mineralet e Ukrainës “në çdo kohë”.

Gjatë fjalimit para Kongresit amerikan, më 4 mars, Trump tha se ka marrë një letër nga Zelensky, në të cilën udhëheqësi ukrainas ka shprehur gatishmërinë e tij për t’u ulur në tryezën e bisedimeve.

“Sot, më herët, kam marrë një letër të rëndësishme nga presidenti Zelensky i Ukrainës. Letra thotë: ‘Ukraina është e gatshme të vijë në tryezën e bisedimeve sa më shpejt që të jetë e mundur, për ta sjellë paqen e qëndrueshme më afër. Askush nuk dëshiron paqe më shumë se ukrainasit’”, tha Trump duke cituar letrën.

Ai tha se 2.000 njerëz vriten çdo javë në luftë - të rinj rusë dhe të rinj ukrainas.

“Dua që kjo të ndalet”, tha Trump, duke pretenduar se Shtetet e Bashkuara kanë shpenzuar “ndoshta 350 miliardë dollarë” në ndihma për Ukrainën, ndërsa Evropa ka shpenzuar vetëm 100 miliardë dollarë.

Bashkimi Evropian i ka kundërshtuar karakterizimet e tilla, duke thënë se vendet e tij anëtare, që nuk e përfshijnë Mbretërinë e Bashkuar, kanë ofruar rreth 145 miliardë dollarë ndihma për Ukrainën.

Trump nuk e përmendi grindjen e tij publike me Zelenskyn, javën e kaluar në Zyrën Ovale. “Ne po shkojmë shumë mirë me ta dhe shumë gjëra po ndodhin”, tha presidenti amerikan.

Trump mbajti fjalimin një ditë pasi njoftoi se ka pezulluar gjithë mbështetjen ushtarake të SHBA-së për Ukrainën, e cila, tash e tre vjet, lufton kundër forcave pushtuese ruse.

Zelensky u largua nga Shtëpia e Bardhë më 28 shkurt pa nënshkruar marrëveshjen për mineralet, siç ishte e planifikuar.

Gjatë një konference për gazetarë më 3 mars, Trump tha se nuk mendon se marrëveshja ka vdekur.

Trump e ka bërë prioritet përfundimin e luftës në Ukrainë. Ai i është drejtuar drejtpërdrejt presidentit rus, Vladimir Putin, të cilin paraardhësi i tij, Joe Biden, e ka izoluar politikisht, prej se ka nisur pushtimin në shkallë të gjerë të fqinjit, në shkurt të vitit 2022.

Daniel Vajdich, president i Yorktown Solutions - kompani që lobon në emër të Kievit - thotë se marrëveshja për mineralet do të ishte e mirë si për Ukrainën, ashtu edhe për Shtetet e Bashkuara.

“Ajo i jep SHBA-së kapital në Ukrainë që duhet mbrojtur”, thotë Vajdich.

Fondi i krijuar nga marrëveshja, do të ishte një mekanizëm i rëndësishëm për ta detyruar sektorin privat të SHBA-së që të investonte në rindërtimin e Ukrainës, shton Vajdich, ish-këshilltar i disa kandidatëve republikanë presidencialë.

Trump e promovoi marrëveshjen si mënyrë për të rikuperuar miliarda dollarët që SHBA-ja ka ndarë për Ukrainën që nga fillimi i luftës dhe për të justifikuar vazhdimin e ndihmave.

Trump e kritikoi Evropën për blerjen e naftës dhe gazit rus dhe paraardhësin e tij, presidentin Joe Biden, për autorizimin e ndihmave për Ukrainën, më shumë se Evropa.

Fjalimi ishte i pari i Trumpit në një sesion të përbashkët të Kongresit prej se mori detyrën, më pak se 50 ditë më parë.

Ai e filloi atë duke thënë se “Amerika është kthyer” dhe duke lavdëruar politikat e tij për imigracionin e krimin, si dhe përpjekjet e Departamentit të Efikasitetit të Qeverisë (DOGE), të udhëhequr nga miliarderi Elon Musk, për të ulur shpenzimet e qeverisë.

Trump e vlerësoi Muskun për, siç tha, identifikimin e “qindra miliarda dollarëve në mashtrime” - një pretendim ky që e tejkalon shumë atë që administrata e tij ka pretenduar deri më tani.

Që nga inaugurimi më 20 janar, Trump ka ndjekur një strategji “tronditjeje dhe frikësimi”, duke bërë ndryshime drastike në politikën e brendshme dhe të jashtme dhe duke përdorur shpesh urdhra ekzekutivë për të anashkaluar Kongresin.

Ai tha se që nga inaugurimi i tij, “nuk ka pasur gjë tjetër veçse veprime të shpejta dhe të pandërprera për të nisur epokën më të madhe dhe më të suksesshme në historinë e vendit tonë”.

Një nga veprimet e tij më të diskutueshme ishin tarifat 25 për qind, të vendosura mbi mallrat nga Kanadaja dhe Meksika - dy prej partnerëve më të mëdhenj tregtarë të Shteteve të Bashkuara.

Tarifat hynë në fuqi më 4 mars, duke shkaktuar rënien më të madhe të aksioneve të SHBA-së në më shumë se dy muaj.

“Qëllim i tarifave është ta bëjnë Amerikën përsëri të pasur dhe ta bëjnë Amerikën përsëri madhështore. Dhe, kjo po ndodh dhe do të ndodhë mjaft shpejt”, tha Trump.

Ryan Sweet, ekonomist në Institutin Oxford Economics, thotë se tarifat do të çojnë në rritje më të ngadalshme ekonomike në SHBA, papunësi më të lartë dhe inflacion më të lartë.

“Ekonomia ka pasur tashmë një fillim të dobët këtë vit, për shkak të një janari jashtëzakonisht të ftohtë, zjarreve në Llos Anxhelos dhe rritjes së pasigurisë në politikë. Tarifat ka të ngjarë të nxisin shqetësime se fillimi i dobët i vitit, mund të shndërrohet në diçka më të keqe”, thotë Sweet.

Disa demokratë të bojkotojnë fjalimin e Trump

Nga: A.Sh

Një numër demokratësh nga të dy dhomat e Kongresit po planifikojnë të anashkalojnë fjalimin e Trump këtë mbrëmje në shenjë proteste.

Senatori Martin Heinrich thotë se ai "do të fillojë të marrë pjesë kur [Trump] të fillojë të ndjekë ligjin".

Senatorja e shtetit të Uashingtonit, Patty Murray, e cila është bërë një kritike kryesore e Trump, thotë se në vend të kësaj ajo do të "flasë me zgjedhësit" që janë pushuar nga puna si pjesë e shkurtimeve të përgjithshme federale të vendeve të punës nga administrata Trump.

Në dhomën tjetër, Përfaqësuesi Don Beyer akuzon Trump se ka treguar "përbuzje dhe shpërfillje totale" për Kongresin dhe thotë se puna e Presidentit në detyrë "nuk është normale, nuk është e pranueshme dhe unë nuk do të marr pjesë".

Në krahun e majtë të partisë, Përfaqësuesja Alexandria Ocasio-Cortez thotë se në vend të kësaj do të postojë në mediat sociale gjatë fjalimit dhe do të transmetojë drejtpërdrejt në Instagram më pas.

Të tjerë që kanë konfirmuar se nuk do të marrin pjesë përfshijnë përfaqësuesit Becca Balint, Diana DeGette, Gerry Connolly dhe Kweisi Mfume.

Capitol Hill përgatitet për fjalimin e Trump

Nga: A.Sh

Presidenti Donald Trump së shpejti do të mbajë fjalimin e tij përpara një sesioni të përbashkët të Kongresit. Kjo është hera e parë që Trump do t'i drejtohet Kongresit që kur fitoi përsëri Shtëpinë e Bardhë në nëntor.

"Vihet re siguri të shtuar kur hyra në ndërtesë, me barrikada dhe gardhe policore si rreth Kapitolit ashtu edhe zonave përreth tij.

Galeria e shtypit në anën e Dhomës së Përfaqësuesve - dhoma ku Trump do të mbajë fjalimin e tij - është e mbushur me gazetarë pa tavolina për të kursyer.

Ne presim një fjalim të gjatë. Fjalimet e mëparshme të Trump para Kongresit kanë zgjatur më shumë se një orë.

Unë do të jem sytë dhe veshët e tu në dhomë - duke parë kush duartroket, kush bërtet dhe kush nuk shfaqet. Qëndroni me ne për më shumë përditësime".

Trump i drejtohet Kongresit mes mospajtimeve me Ukrainën

Presidenti amerikan, Donald Trump, do t'i drejtohet Kongresit për herë të parë që kur mori detyrën, më pak se 50 ditë më parë, me qëllim të avancimit të agjendës së tij të politike, si brenda, ashtu dhe jashtë shtetit, përfshirë pezullimin e ndihmës për Ukrainën.

Trump ka bërë ndryshime drastike në politikën e brendshme dhe të jashtme prej kur ka nisur mandatin, shpesh përmes urdhrave ekzekutivë, për të anashkaluar Kongresin, teksa po përpiqet t’i përmbushë premtimet e fushatës.

Presidenti republikan ka shkarkuar mijëra punonjës federalë; ka vendosur tarifa ndaj Kinës, Meksikës dhe Kanadasë; ka dëbuar qindra emigrantë të paligjshëm; ka krijuar një rezervë të kriptovalutës amerikane, dhe ka rikthyer marrëdhëniet diplomatike me Rusinë, me synim për të përfunduar luftën në Ukrainë.

Çfarë pritet nga fjalimi?

Në një postim më 3 mars në platformën Truth Social, Trump pretendoi se fjalimi i tij "do të jetë i madh".

Ai nuk dha detaje, por fjalimi do të mbahet disa orë pasi ai bëri të ditur pezullimin e gjithë mbështetjes ushtarake të SHBA-së për Ukrainën, në betejën e saj kundër forcave pushtuese ruse, dhe disa ditë pas përplasjes së tij me presidentin ukrainas Volodymyr Zelensky në Zyrën Ovale, çka tronditi aleatët evropianë.

Urdhrat që dalin nga Shtëpia e Bardhë kanë tronditur pothuajse çdo ditë një pjesë të elektoratit, veçanërisht ata me vende pune të lidhura me qeverinë ose tregtinë ndërkombëtare.

“Tema udhëheqëse e fjalimit do të jetë se si Trump po i përmbush premtimet e fushatës së tij, nga vendosja e tarifave deri te reduktimi i fuqisë punëtore federale”, tha Charles Kupchan, analist në Këshillin për Marrëdhëniet me Jashtë, në disa përgjigje për Radion Evropa e Lirë.

“Por, mendoj se Trump e ka punën të vështirë. Popullariteti i tij po fillon të bjerë, tregu i aksioneve po dobësohet. Prandaj, ai duhet të argumentojë se ajo që po bën po funksionon”.

Situata në tregje, pas zgjedhjes së Trumpit, u ka lënë vend shqetësimeve se tarifat do të shkaktojnë sërish inflacion, një çështje që pati një rol të madh në zgjedhjet presidenciale të nëntorit.

Trump tha se tarifat prej 25 për qind ndaj Kanadasë dhe Meksikës, dy nga partnerët më të mëdhenj tregtarë të SHBA-së, do të zbatohen prej 4 mars, çka ka nxitur rënien më të madhe të aksioneve amerikane në më shumë se dy muaj.

Pasojat e zhvillimeve brenda Zyrës Ovale për Ukrainën?

Kupchan tha se pret që Trump të flasë edhe përplasjen tashmë shumë të diskutueshme me Zelenskyn, gjatë fjalimit të tij, por do të përpiqet ta paraqesë atë si "dashuri me sfida”, që nevojitet në këtë moment, për të përfunduar luftën tashmë në vitin e saj të katërt.

Ndërsa kamerat xhironin takimin e tyre në Shtëpinë e Bardhë, më 28 shkurt, Trump kritikoi ashpër Zelenskyn – i cili këmbënguli që garancitë amerikane të sigurisë të ishin pjesë e çdo marrëveshjeje paqeje – duke e cilësuar atë si mosmirënjohës, dhe duke shtuar se ai "nuk ka karta" në negociatat me presidentin rus, Vladimir Putin.

Zelensky udhëtoi drejt Uashingtonit më 28 shkurt për të nënshkruar një marrëveshje për minerale të rralla dhe burime të tjera natyrore të Ukrainës, dhe për të kërkuar që Trump të mbështesë një forcë paqeruajtëse evropiane, nëse arrihet një armëpushim.

Trump e ka bërë prioritet përfundimin e luftës dhe ka përmbysur tre vjet të politikës amerikane, duke biseduar drejtpërdrejt me Putinin, të cilin paraardhësi i tij e kishte izoluar politikisht që nga fillimi i luftës, në shkurt 2022.

Kievi dhe aleatët evropianë druhen se Trump është i gatshëm të imponojë një marrëveshje të pafavorshme për Ukrainën për të arritur qëllimin e tij për t’i dhënë fund luftës sa më shpejt, dhe liderët evropianë kanë nxituar të paraqesin planin e tyre të paqes.

Zelensky u largua nga Shtëpia e Bardhë pas përplasjes, dhe të dy nuk e nënshkruan marrëveshjen për minerale. Gjatë një konference për media, më 3 mars, Trump tha se nuk mendon se marrëveshja është e vdekur, dhe se do të flasë për të para Kongresit.

Zyrtarët amerikanë kanë thënë se Zelensky duhet të kërkojë falje për përplasjen në Zyrën Ovale.

Trump e kishte promovuar marrëveshjen si një mënyrë për të rikthyer miliarda dollarë të mbështetjes amerikane që nga fillimi i luftës, dhe për të justifikuar vazhdimin e ndihmës.

Agjencitë amerikane raportuan më 3 mars se administrata Trump po pezullon ndihmën për Ukrainën "për t’u siguruar që ajo po kontribuon në një zgjidhje".

Kur do të mbahet fjalimi i Trumpit?

Trump do ta mbajë fjalimin e tij në orën 21:00 me orën lokale (në 3:00 të mëngjesit të së mërkurës me orën e Kosovës) në ndërtesën e Kongresit.

Fjalimi i tij i parë para Kongresit, në vitin 2017, gjatë mandatit të tij të parë presidencial, pati zgjatur rreth një orë.

Ai u fokusua në shumë tema që përmend edhe tani, qysh prej kthimit në pushtet: ndalimin e emigracionit të paligjshëm, rritjen e tarifave për të mbrojtur industritë vendase, dhe nxitjen e anëtarëve të NATO-s për të shpenzuar më shumë për mbrojtje.

comment Për komente lëvizni më poshtë
Sot mund të lexoni Shfletoni kopertinat