Kryetari i Bashkisë së Nju Jorkut, Eric Adams, i cili kandidon si i pavarur, deklaroi të premten se nuk do të ndërpresë fushatën e tij për rizgjedhje për të marrë një post në administratën e Trump.
Ekspertët politikë të Nju Jorkut thanë për Newsweek se largimi i Adams do të kishte qenë rruga më e mundshme për ish-guvernatorin Andrew Cuomo për të fituar në zgjedhjet e përgjithshme.
Pse është e rëndësishme:
Adams u zgjodh në vitin 2021 si demokrat, por vendosi të kandidojë si i pavarur pas mbështetjes së ulët në zgjedhjet paraprake, pas akuzave në një çështje korrupsioni(marrje rryshfeyti nga lobist turq) që tashmë është tërhequr.
Fitorja e Mamdani-t kundër Cuomo-s tronditi establishmentin politik të Nju Jorkut, dhe Cuomo zgjodhi ta sfidojë atë si i pavarur në zgjedhjet e përgjithshme. Sondazhet e fundit tregojnë se Mamdani kryeson, por pa një maxhorancë absolute, duke nxitur thirrjet që kandidatët që mbeten prapa, si Adams, të tërhiqen nga gara për të lejuar që votuesit kundër Mamdani-t të bashkohen rreth një kandidati të vetëm.
The New York Times raportoi se administrata e Trump kishte konsideruar t’i ofronte poste Adams-it ose Sliwa-s për të kufizuar garën në dy kandidatë, duke i dhënë Cuomo-s një shans më të mirë për të fituar zgjedhjet e përgjithshme dhe për të fituar mbështetjen e republikanëve dhe demokratëve të moderuar që mbështesin Adams-in.
A po tërhiqet Eric Adams?
Adams konfirmoi vendimin e tij për të qëndruar në garë gjatë një konference për shtyp në Gracie Mansion të Nju Jorkut të premten pasdite.
“Andrew Cuomo është një gjarpër dhe gënjeshtar. Unë jam në garë dhe jam i vetmi që mund të mposht Mamdani-n,” tha ai.
Ai shtoi se ka “dy fëmijë të llastuar që kandidojnë për kryetar bashkie” që “kanë lindur me lugë argjendi në gojë, jo si nju-jorkezët e klasës punëtore.”
“Ata nuk janë si ne. Nuk u është dashur kurrë të luftojnë. Nuk u është dashur kurrë të përballen me vështirësi, siç na është dashur ne, nju-jorkezëve,” tha ai.
Ai mohoi raportet se do të shkonte në Uashington, duke i quajtur ato “ide të gabuara”.
Çfarë tregojnë sondazhet e fundit?
Sondazhet e fundit të një gare me katër kandidatë tregojnë se Mamdani kryeson ndaj kandidatëve të tjerë.
Një sondazh i Tulchin Research i publikuar në gusht tregoi se Mamdani ka 42 për qind mbështetje kundrejt Cuomo-s, Adams-it dhe republikanit Curtis Sliwa, raportoi The New York Post.
Sondazhi zbuloi se Cuomo do të kishte një avantazh ndaj Mamdani-t në një garë me dy kandidatë, duke fituar me 11 pikë (52 për qind kundrejt 41 për qind). Sondazhi u zhvillua me 1,000 votues të mundshëm nga 7 deri më 14 gusht dhe kishte një diferencë gabimi prej plus ose minus 3.1 pikë përqindje.
Një sondazh i Gotham Polling and Analytics/AARP zbuloi se 42 për qind e nju-jorkezëve planifikojnë të votojnë për Mamdani-n, ndërsa 23 për qind thanë se do të votojnë për Cuomo-n.
Sliwa ndjek me 17 për qind, ndërsa Adams ka 9 për qind mbështetje.
Në një skenar ku Adams do të ishte tërhequr, Mamdani do të kishte 43 për qind mbështetje krahasuar me 29 për qind të Cuomo-s dhe 19 për qind të Sliwa-s.
Sondazhi u zhvillua me 1,376 votues të regjistruar më 11 gusht 2025 dhe kishte një diferencë gabimi prej plus ose minus 3.2 pikë përqindje.
Një sondazh nga American Pulse Research & Polling tregoi Mamdani-n me 37 për qind të votave, Cuomo-n me 25 për qind, Sliwa-n me 17 për qind dhe Adams-in me 11 për qind.
Sondazhi u zhvillua me 638 votues të mundshëm nga 14 deri më 19 gusht dhe kishte një diferencë gabimi prej plus ose minus 3.9 pikë përqindje.
Tërheqja e Adams-it do të kishte qenë rruga më e qartë e Cuomo-s për fitore:
Analisti Boris Heersink, profesor i shkencave politike në Universitetin Fordham, tha për Newsweek se një garë me dy kandidatë është “ndoshta e vetmja mënyrë që Cuomo mund të fitojë në këtë pikë”.
“Sondazhet tregojnë vazhdimisht se Mamdani ka aktualisht mbështetje në nivelin e ulët të 40 për qind, ndërsa Cuomo është në mes të 20 për qind. Kjo do të thotë se ka hapësirë që votuesit që aktualisht favorizojnë kandidatët që nuk janë Mamdani të jenë më të shumtë se ata që e mbështesin, me kusht që të bien dakord për një kandidat të vetëm,” tha ai.
Tërheqja e Adams-it mund të mos ketë bërë ndonjë ndryshim të madh, shtoi ai, pasi mbështetja për të ka qenë “shumë e ulët” dhe nuk kishte shumë votues për kandidatët e tjerë për të marrë. Nuk kishte as garanci që të gjithë do të votonin për Cuomo-n, shtoi ai.
“Mamdani është përgjithësisht mjaft i pëlqyer dhe fushata e tij është përqendruar kryesisht në një vizion optimist për Nju Jorkun dhe çështje praktike që mund të jenë tërheqëse edhe për votuesit që aktualisht mbështesin Adams-in ose Sliwa-n.
Pra, në këtë bazë, mendoj se nëse fusha pastrohet, kjo përmirëson shanset e Cuomo-s, por Mamdani do të mbetej ende favorit për të fituar garën,” tha ai.
Joseph Viteritti, profesor i politikave publike në Hunter College, tha për Newsweek se tërheqja e ndonjë kandidati do ta kishte bërë garën më konkurruese, por Mamdani do të mbetej ende një “kandidat i fortë” që tërheq vëmendje të konsiderueshme nga shtypi.
Laura Tamman, profesoreshë asistente klinike e shkencave politike në Universitetin Pace, tha për Newsweek se është “e vështirë të imagjinohet ndonjë skenar ku Cuomo fiton më shumë vota se Mamdani”, pavarësisht nëse Adams ose Sliwa do të tërhiqeshin.
Robert Y. Shapiro, profesor i shkencave politike në Universitetin Columbia, tha për Newsweek se është e pamundur që Sliwa të tërhiqet nga gara, duke vënë në dukje se ai e ka thënë publikisht këtë në mënyrë të qartë.
Rruga më e mundshme e Cuomo-s për fitore do të ishte tërheqja dhe mbështetja e tij nga Adams dhe Sliwa, tha ai. Ai vuri në dukje se mund të jetë e rrezikshme për Trump nëse votuesit demokratë të Nju Jorkut duan të “i japin Trump-it një pengesë të dukshme” dhe të bashkohen rreth Mamdani-t.
Kush është Curtis Sliwa?
Sliwa është kandidati republikan për kryetar bashkie dhe një aktivist komunitar. Ai kandidoi më parë në 2021, por humbi ndaj Adams-it.
Ai është themeluesi i Guardian Angels, një organizatë që ai krijoi për të trajtuar krimin në Nju Jork. Grupi patrullonte rrugët dhe metrotë për të siguruar sigurinë. Sliwa tha në 2024 se grupi do të përqendrohej në kontrollet e mirëqenies për personat e pastrehë.
Fushata e tij përqendrohet kryesisht në çështjet e sigurisë publike dhe përballueshmërisë.
Çfarë thonë njujorkezët?
Newsweek thotë se : Një gjë e fundit për t’u marrë parasysh, se si do të përfundojë kjo garë në Nju Jork, është ajo nëse ndërhyrja Presidentit Trump në garën e kryebashkiak të Nju Jorkut do të bëhet më e qartë javën tjetër, kur Presidenti Trump, vjen në Nju Jork në Asamblenë e 80-të, të OKB-së.