Presidenti i SHBA-së Donald Trump e përshkroi sot planin e armëpushimit prej 20 pikash në Gaza që ai paraqiti më parë këtë javë si një "marrëveshje e shkëlqyer", duke thënë se bisedimet që synojnë sigurimin e një armëpushimi dhe lirimin e pengjeve po "shkojnë shumë mirë".
"Është një marrëveshje e shkëlqyer për Izraelin, dhe është një marrëveshje e shkëlqyer për të gjithë, dhe ju doni të merrni pengjet mbrapsht. Është një marrëveshje e shkëlqyer për të gjithë botën arabe, botën myslimane dhe botën. Jemi shumë të lumtur për këtë. Ata janë në negociata tani që flasim. Ata kanë filluar negociatat, do të zgjasin disa ditë, do të shohim se si do të rezultojë, por po dëgjoj se po shkon shumë mirë," u tha Trump gazetarëve jashtë Shtëpisë së Bardhë, transmeton KosovaPress.
I pyetur nëse ishte i hapur për fleksibilitet në propozimin e tij, Trump tha: "Nuk kemi nevojë për fleksibilitet sepse të gjithë janë dakord me të, por gjithmonë do të ketë ndryshime."
Trump zbuloi planin e tij më 29 shtator, i cili kërkon lirimin e robërve izraelitë, një armëpushim në Gaza, çarmatimin e Hamasit dhe rindërtimin e Gazës. Hamasi ra dakord me planin në parim të premten, dhe negociata të mëtejshme pritej në Egjipt.
Izraeli vlerëson se 48 robër izraelitë mbeten në Gaza, përfshirë 20 të gjallë. Pavarësisht thirrjes së Trump për një ndalim të sulmeve, forcat izraelite të shtunën vranë të paktën 60 palestinezë, përfshirë një vajzë të re, në sulme të vazhdueshme në Rripin e Gazës, sipas mjekëve dhe burimeve lokale, raporton Anadollu.
