Presidenti amerikan Donald Trump deklaroi të mërkurën se Shtetet e Bashkuara kanë fituar luftën me Iranin, duke theksuar megjithatë se nuk do të largohen para se të përfundojnë misionin.
Në një tubim të stilit fushatë në Hebron, Kentucky, Trump tha:“Ne kemi fituar. Më lejoni t’ju them, kemi fituar. E di që nuk të pëlqen të thuash shumë herët që ke fituar, por ne fituam. Në orën e parë, mbaroi".
Ai shtoi se Shtetet e Bashkuara kishin shkatërruar 58 anije luftarake iraniane, duke lavdëruar forcën dhe efektivitetin e ushtrisë amerikane.
Ndryshe nga qëndrimet e mëparshme, Trump u shpreh optimist ndaj kapaciteteve të ushtrisë amerikane për të dobësuar forcat iraniane, por theksoi se nuk dëshiron një përfundim të nxituar të konfliktit. “Ne nuk duam të largohemi herët, apo jo? Duhet të përfundojmë punën,” tha ai, duke theksuar se vendi do të qëndrojë në terren derisa të arrihen objektivat strategjike.
Presidenti amerikan gjithashtu deklaroi se Shtetet e Bashkuara kanë “praktikisht shkatërruar Iranin,” duke lënë të kuptohet se operacionet do të vazhdojnë për një periudhë të pacaktuar
. Ai shtoi: “Ne nuk duam të kthehemi çdo dy vjet,” duke nënkuptuar një angazhim të qëndrueshëm dhe të gjatë të forcave amerikane në rajon.
