Dy persona kanë ngritur veten në erë midis një tregu të stërfrekuentuar në Bagdad, duke lënë të vdekur së paku 32 persona në bombardimin e parë të madh në Irak pas tre vjetësh.
Autoritetet irakiane e përshkruan sulmin si një akt me tipare dalluese të Shtetit Islamik.
Ushtria irakiane ka konfirmuar se dy persona kanë hedhur veten në ajër, në kohën kur qendra e kryeqytetit kishte frekuentimin më të madh të qytetarëve.
Policia ka mbyllur të gjitha rrugët kryesore të Bagdadit për t’i parandaluar sulmet e tjera të mundshme. Sulmet me bomba janë të shpeshta nëpër Irak, por kanë ndodhur më rrallë që prej largimit të ISIS-it.
Sulmi i fundit me bombë ka ndodhur gjithashtu në sheshin Tayaran, gjatë vitit 2018, kur jetën kishin humbur 27 persona.
Dëshmitarët e shpërthimit kanë thënë se njëri prej sulmuesve ishte shtirur si i sëmurë dhe kishte hedhur veten në ajër, teksa njerëzit ishin mbledhur përreth tij.
Autoritetet në Irak nuk besojnë se ISIS-i ka fuqi për të marrë nën kontroll pjesë të shtetit, mirëpo kanë tërhequr vërejtjen për mundësinë e sulmeve të tilla, me qëllim të destabilizimit të Irakut.
