Në një deklaratë të përbashkët, 43 vende i kanë kërkuar Kinës të “garantojë respekt të plotë në sundimin e ligjit” në lidhje me ujgurët në provincën Xinjiang, duke provokuar kritika të forta nga Pekini, i cili denoncoi ” të drejtat e njeriut” në Uashington, Paris dhe Londër.
“Ne i bëjmë thirrje Kinës të lejojë qasje të pavarur dhe mos të pengojë punën e vëzhguesve të pavarur në Xinjiang, përfshirë Komisionerin e Lartë të Kombeve të Bashkuara për të Drejtat e Njeriut,” tha ambasadori francez në Kombet e Bashkuara Nicolas de Riviere, gjatë një takimi online të një komiteti të Asamblesë së Përgjithshme të të drejtave të njeriut.
“Ne jemi të shqetësuar për situatën në Rajonin Autonom të Xinjiang, “tha de Riviere, duke iu referuar informacionit të besueshëm në lidhje me ekzistencën e” kampeve politike, ku më shumë se një milion njerëz po mbahen në mënyrë arbitrare “.
Deklarata e përbashkët e 43 vendeve – përfshirë Shtetet e Bashkuara, vendet europiane dhe Azinë – i referohet torturës, trajtimit çnjerëzor, mizor dhe poshtërues, sterilizimit të detyruar, dhunës seksuale dhe largimit të detyruar të fëmijëve, që synojnë “në mënyrë disproporcionale ujgurët dhe anëtarët e pakicave “.
Duke denoncuar “gënjeshtrat” dhe “komplotin për të dëmtuar Kinën”, ambasadori kinez në OKB Zhang Yun ndërhyri duke hedhur poshtë “akuzat e pabaza”.
“Xinjiang po rritet dhe njerëzit janë krenarë për përparimin që është bërë,” tha Zhang, me mbështetjen e Kubës, e cila ka kritikuar ndërhyrjen e shteteve në punët e brendshme të Kinës. Ambasadori kinez akuzoi Shtetet e Bashkuara, Francën dhe Britaninë se ishin ndër vendet më numrin më të lartë të abuzimeve të të drejtave të njeriut.
Në një letër drejtuar gazetarëve pas samitit, Kina denoncoi “spastrimin çnjerëzor etnik në dëm të indianëve” dhe përshkallëzimin e “ngacmimit të amerikanëve aziatikë” në Shtetet e Bashkuara.
Në të njëjtën kohë, në këtë dokument, Pekini flet për “problemet racore që kanë pllakosur Britaninë prej vitesh”, ndërsa akuzon Francën për “vrasjen e dhjetëra mijëra njerëzve gjatë kolonializmit”, duke i cilësuar “krime kundër njerëzimit”.
