Rritet numri i viktimave nga shpërthimi i vullkanit në Indonezi

Azia

Rritet numri i viktimave nga shpërthimi i vullkanit në Indonezi

Më: 6 dhjetor 2021 Në ora: 10:14
Dëmet e shkaktuara nga shpërthimi i vullkanit në Indonezi.

Ka shkuar në 15 numri i viktimave nga shpërthimi i vullkanit Semeru në Java të Indonezisë. Autoritetet thanë se edhe 27 persona vazhdojnë të jenë të zhdukur.

Ekipet e shpëtimit rinisën punën më 6 dhjetor, disa ditë pasi e ndërprenë punën për shkak të kushteve të këqija atmosferike.

Pasi u përmirësua moti, ekipet arritën të nxjerrin nga gërmadhat trupin e një djali 13-vjeçar. Sipas zyrtarëve, të paktën 56 persona janë hospitalizuar, shumica prej tyre me djegie.

Një shtëllungë e madhe e hirit vullkanik u ngrit 15,000 metra në qiellin e ishullit Java, pasi shpërtheu vullkani Semeru më 4 dhjetor. Ky është vullkani më i madh në Indonezi.

Si pasojë e shpërthimit të vullkanit janë dëmtuar pothuajse 3,000 shtëpi në fshatrat përreth dhe po ashtu ka pasur dëme edhe në shkolla, rrugë dhe ura.

Semeru është një prej mbi 120 vullkaneve aktive në Indonezi, arkipelagun që gjendet në atë që njihet si “Unaza e Zjarrit” në Oqeanin Paqësor.

Herën e fundit, Semeru kishte shpërthyer në janar, por nuk ishte raportuar për viktima.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat