Koreja e Veriut lëshon një tjetër raketë; e dyta nga fillimi i këtij viti

Azia

Koreja e Veriut lëshon një tjetër raketë; e dyta nga fillimi i këtij viti

Më: 11 janar 2022 Në ora: 20:36
Foto ilustrim

Koreja e Veriut lëshoi sot një tjetër raketë, që mendohet se është e llojit balistik. Sipas qeverive të Koresë së Jugut dhe Japonisë, ky është testimi i dytë i zhvilluar këtë vit. 

Ushtria e Koresë së Jugut tha se raketa e Koresë së Veriut duket se ka demonstruar aftësi të përmirësuara krahasuar me raketën që Pheniani lëshoi javën e kaluar. 

Të enjten e kaluar, Koreja e Veriut pretendoi se kreu një provë të suksesshme me një rakete hipersonike. Megjithatë, qeveria e Koresë së Jugut thotë se ky pretendim është i ekzagjeruar. 

Sipas ministrisë së mbrojtjes së Koresë së Jugut, raketa më e fundit përshkoi një distancë prej 700 kilometrash, në një lartësi maksimale prej 60 kilometrash dhe u lëshua nga i njëjti rajon verilindor si raketa e javës së kaluar. 

Raketa ra në det pranë zonës ekonomike ekskluzive të Japonisë dhe nuk pati dëme të raportuara, tha të martën agjensia japoneze e lajmeve Kyodo. 

Prova u krye vetëm pak orë pasi Këshilli i Sigurimit i OKB-së zhvilloi një takim me dyer të mbyllura për të diskutuar lëshimin e raketave nga Koreja e Veriut. Shtetet e Bashkuara dhe pesë vendet e tjera të Këshillit të Sigurimit i dënuan provat e raketave duke i konsideruar “një kërcënim domethënës për stabilitetin rajonal”./VOA

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat