Vendimi i qeverisë izraelite për të ndaluar hyrjen e shumicës së punëtorëve palestinezë nga Bregu Perëndimor pas sulmit të Hamasit të 7 tetorit, mund të përfundojë duke i kushtuar ekonomisë deri në 830,307,300 dollarë në muaj.
Siç raporton Time of Israel, këto komente i bëri një përfaqësues i Ministrisë së Financave të Izraelit.
Më shumë se 10,000 punëtorë, kryesisht ata nga Tajlanda që punonin në bujqësi, janë larguar nga vendi që nga sulmi vrasës i Hamasit pothuajse tre muaj më parë.
Raportet thonë se Izraeli mund të ketë nevojë për më shumë se 30,000 punëtorë të huaj, për të mbushur boshllëkun e lënë nga këta punëtorë në fushat e ndërtimit dhe bujqësisë.
Mungesa u përkeqësua nga vendimi i qeverisë për të ndaluar hyrjen e shumicës së punëtorëve nga Bregu Perëndimor, dhe mobilizimi i qindra mijëra rezervistëve izraelitë për luftën kundër Hamasit.
“Jemi në një situatë shumë të vështirë”, u ankua Raul Sargo, president i Shoqatës së Kontraktorëve të Ndërtimit për Bonei Haaretz.
“Industria e ndërtimit është në një ndalesë të plotë dhe është vetëm 30 për qind produktive, 50 për qind e objekteve janë mbyllur dhe ka një ndikim në ekonominë izraelite dhe tregun e pasurive të paluajtshme”, shtoi ai.
Pavarësisht ndalimit të përgjithshëm, një përfaqësues i IDF-së u thotë ligjvënësve se qeveria ka bërë një përjashtim për punëtorët palestinezë të angazhuar në fusha “kritike” si hoteleria, industria dhe shëndetësia.
Javën e kaluar, Komanda Qendrore e IDF-së vendosi që midis 8,000 dhe 10,000 punëtorëve palestinezë nga Bregu Perëndimor, të kthehen në punët e tyre në vendbanimet dhe bizneset izraelite në Bregun Perëndimor.
Vendimi erdhi pas presioneve të konsiderueshme nga pronarët e fabrikave dhe bizneseve, të cilët po vuajnë financiarisht për shkak të humbjes së një pjese të madhe të fuqisë punëtore.
“Shteti i Izraelit duhet të vendosë nëse do të ndihmohet nga duart palestineze apo jo”, tha kryetari i komitetit Eliyahu Revivo në takimin e sotëm.
“Derisa të gjenden zgjidhjet, shteti është ende i varur nga punëtorët palestinezë. Qeveria po zvarritet për këtë çështje,” shtoi ai.
