Më shumë se 200 palestinezë u vranë ndërsa Izraeli sulmoi Gazën për të liruar katër pengje, pretendon Hamasi, në një nga ditët më të përgjakshme të luftës.
Gjatë misionit, i përshëndetur si “heroik” në Izrael, ushtria tha se liroi pengjet nën të shtëna armësh dhe u përgjigj me goditje “nga ajri dhe nga rruga”, shkruajnë mediat e huaja.
Por sulmi që pasoi në Al Nuseirat të Gazës qendrore, një kamp historik refugjatësh palestinezë, çoi në skena si një “film horror”, sipas banorëve.
Ndërsa Izraeli pranoi “më pak se 100” viktima palestineze, Hamasi tha se të paktën 210 njerëz janë vrarë dhe të tjerë janë plagosur – megjithëse nuk është e qartë se sa ishin militantë.
Ekipet e ndihmës së shpejtë dhe banorët e Gazës thanë se sulmi vrau shumë njerëz dhe la trupa burrash, grash dhe fëmijësh rreth një tregu dhe një xhamie.
“Ishte si një film horror, por kjo ishte një masakër e vërtetë”, ka theksuar Ziad, 45 vjeç, një ndihmës mjek dhe banor i Nuseirat.
“Dronët dhe fluturaket luftarake izraelite qëlluan gjatë gjithë natës në shtëpitë e njerëzve dhe mbi njerëzit që u përpoqën të largoheshin nga zona”.
“Për të liruar katër persona, Izraeli vrau dhjetëra civilë të pafajshëm”, ka shtuar ai.
Dhe një reagim ka ardhur nga përfaqësuesi i lartë i BE-së për politikën e jashtme, Josep Borrell, i cili tha se raportet për “një tjetër masakër” janë “të tmerrshme”.
“Ne e dënojmë këtë me termat më të ashpër”, shtoi ai. “Gjakderdhja duhet të përfundojë menjëherë”.
Ndërsa ministri izraelit Eli Cohen u kundërpërgjigj, duke akuzuar Borrell se dënoi shpëtimin kur ai duhej të kritikonte Hamasin për “fshehjen e pengjeve” pas civilëve.
