Numri i të vdekurve nga fundosja e anijes në ngushticën e Balit në Indonezi rritet në 17

Azia

Numri i të vdekurve nga fundosja e anijes në ngushticën e Balit në Indonezi rritet në 17

Më: 12 korrik 2025 Në ora: 06:13
Foto ilustrim

Numri i të vdekurve nga fundosja e një anijeje pasagjerësh në ngushticën e Balit në Indonezi u rrit në 17 të premten.

Në një konferencë të përbashkët për shtyp virtuale, Ribut Eko Suyanto, zëvendës për operacionet e kërkim-shpëtimit në Agjencinë Kombëtare të Kërkimit dhe Shpëtimit, konfirmoi se dy trupa të tjerë u gjetën të premten.

“Ekipi i përbashkët i shpëtimit zbuloi dy trupa dhe ne i kemi evakuuar ata”, tha ai, duke shtuar se të dy viktimat ishin transportuar në spital për identifikim.

Suyanto vuri në dukje se kërkimi tani po përqendrohej në pjesën jugore të ngushticës, pas raportimeve nga peshkatarët vendas të cilët gjetën disa objekte që besohet të jenë pjesë të anijes së mbytur.

Ndërkohë, Soerjanto Tjahjono, kreu i Komitetit Kombëtar të Sigurisë së Transportit (KNKT), tha se rrymat e forta nënujore në ngushticë paraqesin sfida të konsiderueshme.

Megjithatë, KNKT po punon për të vendosur në përdorim një automjet të telekomanduar (ROV) për të hetuar gjendjen e rrënojave.

“Ne do të bëjmë çmos për të vendosur ROV-në. Pasi të dimë gjendjen e anijes, nëse është drejt, e anuar apo e mbështetur në shtratin e detit, ne do të përcaktojmë nëse zhytësit mund të hyjnë në të në mënyrë të sigurt”, tha ai.

Anija që transportonte 65 persona u fundos më 2 korrik dhe 30 prej tyre mbijetuan.

comment Për komente lëvizni më poshtë
Sot mund të lexoni Shfletoni kopertinat