Turqia thotë se për dy ditë ka vaksinuar kundër Covid-19 mbi 500.000 persona

Evropë

Turqia thotë se për dy ditë ka vaksinuar kundër Covid-19 mbi 500.000 persona

Më: 15 janar 2021 Në ora: 13:53
Ilustrim

Autoritetet turke kanë thënë se janë vaksinuar mbi 500.000 persona me vaksinën kineze kundër koronavirusit në dy ditët e para të fushatës së vaksinimit.

Ankaraja e filloi fushatën e vaksinimit me vaksinën e kompanisë kineze, Sinovac, të enjten dhe të parët po vaksinohen punëtorët e sektorit të shëndetësisë. Në ditën e parë u vaksinuan 285 mijë persona.

Deri në mesditën e së premtes, numri i përgjithshëm i personave të vaksinuar shkoi në 523.338, tregojnë të dhënat e Ministrisë së Shëndetësisë. Kjo shifër e bën Turqinë shtetin me më së shumti persona të vaksinuar në ditët e para të procesit, shkruan The Guardian.

Qeveria turke tha se zhvillimi i shpejtë i fushatës së vaksinimit është ndihmuar nga shpërndarja e dozave në tërë vendin në fillim të kësaj jave, regjistrat e digjitalizuar shëndetësorë dhe shërbimet spitalore.

“Ne jemi vend me përvojë në zbatimin e programeve mbarëkombëtare të vaksinimit. Infrastruktura jonë është shumë e aftë për realizimin e këtij programi në mënyrë të kontrolluar. Do ta fitojmë betejën me këtë pandemi së bashku”, shkroi në rrjetet sociale ministri turk i Shëndetësisë, Fahrettin Koca.

Dozën e parë të vaksinës kineze kundër koronavirusit të enjten e mori edhe presidenti turk, Rexhep Erdogan. Ai u bëri thirrje edhe politikanëve tjerë të vendit që ta marrin vaksinën, ndërsa nga populli kërkoi që t’i injorojnë kritikat për këtë vaksinë.

Shfaq komentet
comments powered by Disqus
Sot mund të lexoni Shfletoni kopertinat