Rel: Kardinali gjerman ofron dorëheqje për shkak të abuzimeve seksuale në kisha

Evropë

Rel: Kardinali gjerman ofron dorëheqje për shkak të abuzimeve seksuale në kisha

Më: 4 qershor 2021 Në ora: 14:14
Disa kardinalë katolikë. Pamje nga arkivi.

Kleriku i Kishës Katolike të Gjermanisë, kardinali Reinhard Marx, i ka ofruar dorëheqjen Papa Françeskut, për shkak të skandaleve me abuzime seksuale të fëmijëve nëpër kisha.

“Është e rëndësishme që të ndaj përgjegjësinë për katastrofën e abuzimeve seksuale nga zyrtarët e kishës në dekadën e fundit”, ka thënë ai në letrën dërguar Papës.

Ai është kryepeshkop i Mynihut.

Papa është duke analizuar kërkesën e tij, derisa më herët ka dërguar dy peshkopë në Këln që hetojnë këto abuzime.

Më 2018, në një studim të kryer nga vetë kisha, është gjetur që më shumë se 3,600 fëmijë në Gjermani janë sulmuar seksualisht nga priftërinjtë katolikë në periudhën 1946-2014.

Vetëm 38 për qind e të dyshuarve për kryerje të këtyre veprave janë gjykuar, dhe shumica janë përballur me procedura të vogla disiplinore.

Rreth një në gjashtë raste ka përfshirë dhunimin. Shumica e viktimave kanë qenë djem dhe më shumë se gjysma kanë qenë të moshës 13-vjeçare apo më të rinj.

Në letrën e tij, kardinali Marx ka thënë se hetimet në vitet e fundit kanë shpërfaqur “shumë dështim personal dhe gabime administrative”, por edhe “dështim sistematik institucional”, sa u përket abuzimeve seksuale të fëmijëve.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat