Sllovenia dhe Republika Çeke regjistrojnë rastet e para të lisë së majmunëve

Evropë

Sllovenia dhe Republika Çeke regjistrojnë rastet e para të lisë së majmunëve

Më: 24 maj 2022 Në ora: 16:45
Foto ilustrim

Autoritetet shëndetësore të Sllovenisë kanë konfirmuar rastin e parë të infeksionit me li të majmunëve, në një udhëtar që ishte kthyer nga Ishujt Kanarie të Spanjës.

Burri nuk u shtrua në spital sepse ishte infektuar nga një version i butë i llojit të sëmundjes virale të Afrikës Perëndimore, tha Mario Fafangel, kreu i Qendrës Kombëtare për Sëmundjet Infektive, në një konferencë shtypi të martën.

Fafangel tha se ai besonte se zinxhiri i transmetimit në Slloveni do të ndalet shpejt dhe se nuk kishte nevojë që popullata e gjerë të vaksinohej, shtoi ai, përveç atyre që trajtojnë virusin në laboratorë.

Gjithashtu, të martën, Republika Çeke regjistroi rastin e parë të lisë së majmunëve.

Pavel Dlouhy, kreu i Shoqatës Çeke për Sëmundjet Infektive, i tha agjencisë së lajmeve AFP, të martën, se sëmundja u zbulua te një burrë në Spitalin Universitar Ushtarak të Pragës, por nuk pranoi të jepte ndonjë detaj.

“Ishte vetëm një çështje kohe, ne e kemi pritur këtë për ditë të tëra”, tha Dlouhy.

Gjatë ditëve të fundit, disa vende evropiane dhe të Amerikës së Veriut, përfshirë Mbretërinë e Bashkuar, Francën dhe Shtetet e Bashkuara, kanë raportuar raste të virusit të rrallë, i cili është endemik në pjesë të Afrikës.

Megjithatë, autoritetet mjekësore kanë thënë se rreziku që sëmundja të përhapet gjerësisht është i ulët.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat