Mbingarkesa në aeroporte, Gjermania ka nevojë për mijëra punëtorë të huaj

Evropë

Mbingarkesa në aeroporte, Gjermania ka nevojë për mijëra punëtorë të huaj

Më: 29 qershor 2022 Në ora: 09:05
Ilustrim

Gjermania synon të sjellë punëtorë të huaj sa më shpejt që të jetë e mundur për të lehtësuar aeroportet e mbingarkuara nga mungesat e personelit gjatë sezonit të verës.

Punëtorët e përkohshëm, të cilëve do t’u ofrohet akomodim dhe një pagë standarde, do të duhet të kryejnë të njëjtat kontrolle sigurie dhe besueshmërie si pjesa tjetër e personelit, si mbajtësit e bagazheve. Këto kontrolle në përgjithësi zgjasin rreth dy javë.

Udhëtarët në të gjithë Evropën po përballen me radhë të gjata këtë verë, pasi kërkesa për udhëtime është rikthyer plotësisht pas izolimeve të pandemisë COVID-19. Aeroportet dhe linjat ajrore po hasin probleme me mbajtjen e një numri të mjaftueshëm të punonjësve të për të përballuar krizën.

Sipas Shoqatës së Aeroportit ADV, rreth një në pesë vende pune në fushën e sigurisë, të check-in dhe në mirëmbajtjen e avionëve është vakant.

Aeroportet pritet të shpallin nevojat e tyre të sakta në ditët në vijim, por kreu i shoqatës ABL të punonjësve të transportit të avionëve pret që të nevojiten rreth 1,000 deri në 2,000 punëtorë për tre muaj, me shumë gjasa duke filluar nga gushti.

“Një afat kohor prej maksimumi gjashtë muajsh deri në fund të vitit do të kishte qenë një ide e mirë. Nuk ka për ta zgjidhur problemin, por sigurisht që do të ndihmojë”, tha Thomas Richter.

Nga ana tjetër, dëshira për të sjellë sa më shpejt punëtorë shtesë nga jashtë përballet me nevojën për të garantuar sigurinë e aeroporteve, me ministren e Brendshme, Nancy Faeser e cila theksoi se nuk do të kishte tolerime në këtë drejtim.

Andreas Rosskopf, kryetari i sindikatës së policisë së Gjermanisë, tha se punëtorët e huaj të saporekrutuar mund të përdoren për punë të tilla si mbajtja e bagazheve, por paralajmëroi kundër përpjekjeve për t’i vendosur ata në pozicione që kërkojnë siguri shtesë.

“Ne po flasim për njerëz që duhet të kontrollohen intensivisht dhe të informohen për sa i përket sigurisë. Kjo kërkon një kohë të caktuar”, tha Rosskopf.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat