​Putin pranon garancitë në stilin e NATO-s për Ukrainën, por ka një kusht

Evropë

​Putin pranon garancitë në stilin e NATO-s për Ukrainën, por ka një kusht

Më: 22 nëntor 2026 Në ora: 17:56
Presidenti rus Vladimir Putin

Presidenti rus Vladimir Putin thuhet se ka rënë dakord në bisedime private me idenë që Ukraina të marrë garanci sigurie nga SHBA dhe Evropa pas luftës, të modeluara sipas Nenit 5 të NATO-s, por ai vendosi një kusht kyç që asnjë forcë e Aleancës të mos stacionohet në territorin ukrainas.

Ky informacion u raportua nga kolumnisti i Washington Post, David Ignatius, bazuar në një burim pranë negociatave, transmeton KosovaPress.

Neni 5 i Traktatit të Atlantikut të Veriut është parimi themelor i mbrojtjes kolektive të NATO-s, sipas të cilit një sulm i armatosur ndaj një anëtari të Aleancës konsiderohet një sulm ndaj të gjithë anëtarëve, gjë që i detyron ata të ofrojnë ndihmë vendit të sulmuar, duke përfshirë përdorimin e forcës ushtarake.

Në kontekstin e negociatave të Ukrainës, garancitë e modeluara sipas këtij neni do të thoshin se SHBA dhe vendet evropiane do të ishin të detyruara ligjërisht të vinin në mbrojtje të saj nëse Rusia e sulmon përsëri, edhe pse Ukraina nuk do të bëhej zyrtarisht anëtare e NATO-s dhe as forcat aleate nuk do të vendoseshin në territorin e saj në kohë paqeje.

Sipas të njëjtit burim, marrëveshja do të përfshinte heqjen e sanksioneve kundër Rusisë, të cilat do të rivendoseshin automatikisht nëse Moska do të fillonte të grumbullonte trupa për një sulm të ri.

Wall Street Journal shkruan se Shtetet e Bashkuara i ofrojnë Ukrainës garanci sigurie ligjërisht të detyrueshme bazuar në Nenin 5 të NATO-s, por pa anëtarësim formal në Aleancë.

Burimet e gazetës thonë se Uashingtoni po premton në këtë mënyrë mbrojtje kundër çdo agresioni të ardhshëm në mënyrë që të inkurajojë përparimin në negociata.

Rusia më parë e kishte konsideruar propozimin amerikan për garancitë në stilin e NATO-s të papranueshëm.

Nga ana tjetër, presidenti ukrainas Volodymyr Zelensky theksoi se Ukraina mbetet e vendosur të bëhet anëtare e plotë e NATO-s. 

Sot mund të lexoni Shfletoni kopertinat