Papa Françesku ka përshëndetur nisjen nga portet ukrainase të Detit të Zi të anijeve të para që transportonin grurë të bllokuara më parë nga Rusia.
Ai është shprehur se përparimi mund të jetë një model për dialogun për t’i dhënë fund luftës në Ukrainë.
Në fjalimin e tij të përjavshëm drejtuar pelegrinëve dhe turistëve në Sheshin e Shën Pjetrit të dielën, Papa Françesku tha:
"Ky hap tregon se është e mundur të zhvillohet dialog për të arritur rezultate konkrete, të cilat i ndihmojnë të gjithëve. Kjo ngjarje paraqitet si një shenjë shprese dhe dëshira ime e përzemërt është që duke ndjekur këtë rrugë, të jetë e mundur t’i jepet fund luftimeve dhe të arrihet një paqe e drejtë dhe e qëndrueshme."
