Një zjarr i madh ka shpërthyer pranë aeroportit Heathrow të Londrës, por nuk ka rrezik për operimin e fluturimeve, raporton “Mirror”.
Gazeta londineze shton se një re e madhe tymi po ngrihet në qiell, ndërsa zjarrfikësit paralajmërojnë se zjarri është përhapur në kopshtet e shtëpive të banorëve në Feltham, në Londrën perëndimore.
Shumë që jetojnë afër thanë se dëgjuan një shpërthim të fortë dhe një dëshmitar okular tha se dëgjoi një zhurmë si "një bombë ose një lloj shpërthimi".
Dhjetë makina zjarrfikëse dhe rreth 70 zjarrfikës ndodhen në vendin e zjarrit dhe deri më tani janë marrë 44 thirrje.
Policia e qytetit këshillon qytetarët që të shmangin zonën.
Një zëdhënës i Heathrow tha për MyLondon se zjarri nuk ka ndikuar në itinerarin e fluturimeve në aeroport dhe se ato po zhvillohen normalisht.
Feltham është goditur nga zjarre të shumta javët e fundit ndërsa moti i thatë vazhdon.
