Inflacioni në Mal të Zi thyen një tjetër rekord - 14.9% në korrik

Evropë

Inflacioni në Mal të Zi thyen një tjetër rekord - 14.9% në korrik

Më: 16 gusht 2022 Në ora: 16:39
Foto ilustrim

Çmimet e konsumit në Mal të Zi u rritën 14.9 për qind në korrik në bazë vjetore, sipas të dhënave të Administratës së Statistikave, Monstat.

Kjo është gjithashtu një rekord i ri që nga viti 2008, kur Monstat publikon indeksin e çmimeve të konsumit si masë ndërkombëtare të inflacionit, si dhe që nga futja e euros në Mal të Zi në vitin 2002, kur lëvizja e çmimeve me pakicë u përdor për llogaritjen e inflacionit. 

Ky është muaji i katërt radhazi që në Mal të Zi regjistrohet i ashtuquajturi inflacion galopant - rritje dyshifrore e çmimeve të konsumit në nivel vjetor.

Sipas të dhënave të reja, nga korriku i vitit të kaluar deri në të njëjtin muaj të vitit 2022, rritja më drastike e çmimeve është shënuar te lëndët djegëse të ngurta, me 49.9 për qind, pasuar nga nafta me 37.6 për qind dhe perimet me 35.8 për qind.

Në të njëjtën kohë, buka dhe drithërat u rritën 33.3 për qind, karburantet 32.2 për qind, qumështi dhe vezët 29.3 për qind, shërbimet e akomodimit 29 për qind, mirëmbajtja e apartamenteve 25.3 për qind, mjalti dhe sheqeri 22.6 për qind.

Rritje të ndjeshme pësuan edhe çmimet e mishit (16.6%), frutave (14.1%), transportit rrugor (13.4%) dhe shërbimeve të restoranteve (10.3%).

Nga ana tjetër, më së shumti ranë çmimet e furnizimit me ujë 7.5 për qind, aranzhimet e paketave turistike 5 për qind, kanalizimet 4.8 për qind dhe pajisjet audio-video 4.5 për qind.

Në bazë mujore, rritja e inflacionit në Mal të Zi ishte 1.5 për qind në korrik.

Në periudhën janar-korrik 2022, krahasuar me të njëjtën periudhë të vitit 2021, çmimet e konsumit janë rritur me 10.5 për qind.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat